Qorqyt ata atyndaǵy Qyzylorda ýnıversıtetiniń Jasandy ıntellekt ınstıtýtynda oqytýshylarǵa arnalǵan jazǵy mektep ótti. Basqarma múshesi, İT jáne strategıalyq josparlaý jónindegi prorektor Mahmýd Tomanov, Jasandy ıntellekt ınstıtýtynyń dırektory Nurlan Qulmyrzaev jáne IT mamandar jazǵy mektepti júrgizdi, dep habarlaıdy almaty-akshamy.kz.
Oqytýshylardyń biliktiligin arttyrý maqsatynda «Jasandy ıntellekt arqyly oqytý ádisterin damytý» taqyrybynda biliktilikti arttyrý kýrsy uıymdastyryldy. Kýrstyń alǵashqy kúnin Microsoft AQ-nyń TMD elderinde bilim berýdi damytý bóliminiń basshysy Danıar Jumabekov arnaıy shaqyrylyp, «Qorqyt Ata ýnıversıtetindegi sıfrlyq transformasıa: Microsoft AI arqyly jańa múmkindikterge jol ashyńyz» taqyrybynda semınar ótkizdi.
Kýrs maqsaty – jasandy ıntellekt negizgi uǵymdarymen jáne ádisterimen tanystyrý, bilim berýde AI qoldanýdyń etıkalyq aspektilerin zertteý, oqý úderisin jaqsartý úshin AI agentteri men derekterdi taldaý quraldaryn paıdalaný daǵdylaryn damytý.
Bilim ordasynyń 200-ge jýyq profesor-oqytýshylary 72 saǵat boıy teorıalyq jáne praktıkalyq bilim alyp, AI negizgi túsinikteri men ádisteri, mashınalyq oqytý, tereńdetip oqytý, tabıǵı tildi óńdeý, kompúterlik kórý jáne generatıvti AI-dy bilim berý úderisinde qoldaný ádisterin meńgerdi.
Ózindik jumys saǵatynda hattardy qurastyrý, halyqaralyq seriktesterdi izdeý, hattar men ótinimderdi daıyndaýdy avtomattandyrý, maqsatty baǵdarlamalyq qarjylandyrý ázirleý jáne AI-agentti paıdalaný jobasyn ázirleý daǵdylaryn úırendi. Kýrs uıymdastyrýshylary JI navıgator 1.0 ádistemelik quralyn osy jazǵy mektep barysynda qatysýshylarǵa paıdalaný úshin tabys etti. Kýrs sońynda barlyq qatysýshylarǵa sertıfıkat tabystaldy. Jasandy ıntellekt boıynsha biliktilikti arttyrý kýrstary aldaǵy ýaqytta da ótkizilip turady.