Qazaqstan Respýblıkasy Oqý-aǵartý mınıstri Ǵanı Beısembaev «Qytaı – Ortalyq Azıa» Bilim mınıstrleriniń alǵashqy keńesine qatysty
Úrimshi qalasynda Qytaı Halyq Respýblıkasy men Ortalyq Azıa elderi – Qazaqstan, Ózbekstan, Qyrǵyzstan, Tájikstan jáne Túrikmenstannyń bilim mınıstrleri, sondaı-aq tıisti vedomstvolar men dıplomatıalyq korpýs ókilderiniń qatysýymen alǵashqy keńes ótti. Jıynnyń basty taqyryby – bilim berý salasyndaǵy ıntegrasıa men ornyqty áriptestikti qurý máseleleri boldy.
Qazaqstan Respýblıkasynyń Oqý-aǵartý mınıstri Ǵanı Beısembaev óz sózinde qatysýshy elder arasyndaǵy yntymaqtastyqty nyǵaıtý men bilim berý boıynsha ortaq bastamalardy júzege asyrýdyń mańyzdylyǵyn atap ótip, tehnıkalyq jáne kásiptik bilim berý salasyndaǵy odan arǵy ózara is-qımyldyń negizgi baǵyttaryna toqtaldy.
«Qazaqstanda Memleket basshysy Qasym-Jomart Toqaevtyń bastamasymen 2025 jyl Jumysshy mamandyqtar jyly dep jarıalandy. Qazirgi ýaqytta tehnıkalyq jáne kásiptik bilim berý júıesinde aýqymdy ózgerister júzege asýda. Internasıonaldandyrý aıasynda álemniń jetekshi kolejderi men óndiristik kásiporyndarymen seriktestik ornatylyp, bıznes qaýymdastyqpen yntymaqtastyq keńeıýde, pedagogter men stýdentter úshin akademıalyq utqyrlyq jetildirilýde. Qazaqstan yntymaqtastyqqa ashyq jáne jahandyq eńbek naryǵynda suranysqa ıe kadrlardy daıarlaýǵa baǵyttalǵan ortaq tásilderdi ázirleýdi qoldaıdy», – dedi Ǵanı Beısembaev.
Keńes qorytyndysy boıynsha qatysýshy elder Bilim mınıstrleriniń keńesi mehanızminiń Jarǵysyn jáne «Úrimshi deklarasıasyn» qabyldady. Bul qujattar aldaǵy yntymaqtastyqtyń negizin aıqyndap, joǵary bilikti mamandar daıarlaý isiniń basymdyqtaryn bekitedi.
Aıta keterligi, kelesi mınıstrler keńesi Qazaqstanda ótedi. Rotasıa tártibine sáıkes, Ortalyq Azıa elderi men Qytaıdyń Bilim mınıstrleriniń ekinshi keńesin ótkizý quqyǵy men tóraǵalyq bizdiń elge berildi.