Qazaqstannyń Energetıka mınıstrligi 2024–2025 jyldardaǵy jylytý maýsymynyń qorytyndysyn shyǵaryp, eldegi gazben qamtý júıesiniń turaqty jumysyn jáne tabıǵı gaz tutyný kóleminiń artqanyn atap ótti
Qazaqstan Respýblıkasy Energetıka mınıstrliginde Vıse-mınıstr Álibek Jamaýovtyń tóraǵalyǵymen 2024–2025 jyldardaǵy kúzgi-qysqy kezeńniń ótý qorytyndylary jáne aldaǵy jylytý maýsymyna daıyndyq sharalary boıynsha keńes ótti.
Keńeske «QazaqGaz Aimaq» AQ bas dırektory Baýyrjan Askarov qatysty. Maýsym qorytyndysy boıynsha eldiń gaz tasymaldaý jáne gaz taratý júıeleri tutynýshylardy turaqty ári úzdiksiz gazben qamtamasyz etti. Qazirgi ýaqytta aldaǵy jylytý maýsymyna daıyndyq bastalyp ketken. 2025 jyldyń qańtarynda, ıaǵnı eń joǵary júkteme kezeńinde, gazdyń saǵattyq eń joǵarǵy tutyný kólemi 4 582 myń m³-ti qurady. Avarıalyq-dıspecherlik qyzmet 46 myńnan astam ótinimdi óńdedi. 72,5 myń km-den astam jeli men 35 myńǵa jýyq nysandy 4 myńnan astam maman, onyń ishinde táýlik boıy kezekshilik etetin brıgadalar qamtamasyz etti.
– «İshki tutyný kóleminiń ósýine jáne 2025 jyldyń qańtaryn qosa alǵanda, qysqy maýsymda júktemeniń artýyna qaramastan, gazben jabdyqtaý júıeleri turaqty jumys istedi. Bul barlyq tartylǵan qyzmetterdi júıeli daıyndaýdyń jáne ózara tıimdi jumystyń nátıjesi», - dedi vıse-mınıstr Álibek Jamaýov.
Sondaı-aq, ol «QazaqGaz Aimaq» AQ-ǵa 2025–2026 jyldardaǵy jylytý maýsymyna daıyndyq aıasyndaǵy barlyq is-sharalardy ýaqtyly aıaqtaýdy tapsyrdy. Sonymen qatar, áleýmettik qoldaýdyń qoljetimdiligi men ashyqtyǵyn arttyrý quraly retinde «Áleýmettik ámıan» sıfrlyq servısin respýblıkanyń búkil aýmaǵynda keńinen engizýdi jedeldetip júzege asyrýdy tapsyrdy.