Qazaqstan Respýblıkasy Ulttyq ulan «Ońtústik» óńirlik qolbasshylyǵynyń 500-den astam jaýyngeri elimizdiń batys óńirindegi sý basqan eldi mekenderge kómek kórsetýge jiberildi.
Keshe sý tasqynyna qarsy is-sharalardy úılestirý jáne sý tasqyny saldaryn joıý jónindegi respýblıkalyq shtabtyń jumys keńesi ótti. Kún tártibinde sý tasqynynyń ekinshi tolqyny bolýy múmkin batys óńirlerdegi jaǵdaı basty másele retinde qaraldy.
Premer-mınıstr Oljas Bektenovtyń tapsyrmasy boıynsha Atyraý, Batys Qazaqstan jáne Soltústik Qazaqstan oblystarynyń turǵyndaryna kómektesý úshin Ulttyq ulannyń kúshteri men quraldary jiberilýde. Úkimet basshysy oblys ákimdikterine keletin áskerı qyzmetshilerdi barlyq qajetti zattarmen qamtamasyz etýdi, sondaı-aq tehnıkaǵa janarmaı quıý máselesin sheshýdi tapsyrdy.
Oral qalasynda qyzmet atqaryp jatqan jeke quram men tehnıkalarǵa qosymsha 6506 (Shymkent q.) áskerı bóliminen 300 áskerı qyzmetshi men 15 avtomobıl jáne 5547 (Qyzylorda q.) áskerı bóliminen 200 sarbaz ben 7 tehnıka kómekke jiberildi. Olar Oral qalasyna deıin temir jol kóligimen 1500 shaqyrymnan astam jol júrip ótedi. «Ońtústik» óńirlik qolbasshylyǵynyń áskerı bóliminen jasaqtalǵan sý tasqyny zardaptaryn joıý jónindegi jıyntyq otrádyn «Ońtústik» óńirlik qolbasshylyǵy qolbasshysynyń tehnıka jáne qarý-jaraq jónindegi orynbasary Igor Popovskıı basqardy.
Aıta keteıik, jalpy alǵanda, Ulttyq ulannyń 2700-den astam jaýyngeri men 120 tehnıkasy jáne avıa transporttary elimizdiń barlyq sý basqan óńirlerinde belsendi kómek kórsetip jatyr. Olar sý basqan kentter men qalalarda patrúldeý arqyly turǵyndardyń jeke múlikterin qorǵaýdy qamtamasyz etýde, jaǵalaýdy nyǵaıtý jumystaryna qatysýda, sý tasqyny bolǵan eldi mekenderde sý burýdy jáne kanaldardy tazartýdy júzege asyrýda. Budan bólek adamdardy, janýarlardy qaýipsiz jerlerge evakýasıalaý jumystarymen de shuǵyldanyp júr.