Ońtústik Koreıa astanasynda Helloýın merekesin toılaý kezinde keminde 151 adam mert boldy, onyń 19-y sheteldik. Osyǵan baılanysty el prezıdenti Iýn Sok Ól jeksenbi kúni Ulttyq aza tutý kúnin jarıalap, memlekettik týlar túsirildi. Bul týraly Almaty-akshamy.kz Inform.kz-ke silteme jasap habarlaıdy.
Iýn Ithevon aýdanynda tar kóshede adamdar tobynyń merekege kelgen balalardy taptap ketý oqıǵasynan soń el halqyna prezıdent ǵımaratynan tikeleı efır arqyly habarlasyp, málimdeme jasady.
«Bul –masqara! Senbi kúngi qaıǵyly jaǵdaı eshqashan bolmaýy kerek edi»,- dedi Iýn.
«Adamdardyń ómiri men qaýipsizdigi úshin jaýapty tulǵa retinde bul jaǵdaı maǵan óte aýyr tıdi jáne maǵan bul sezimnen aıyǵý ońaı bolmaı tur»,-dedi el prezıdenti.
«Úkimet búginnen bastap jaǵdaı tolyq baqylaýǵa alynǵanǵa deıingi aralyqty qaraly kún dep jarıalaıdy jáne birinshi kezekte qalpyna keltirý men odan keıingi sharalardyń ákimshilik máselelerine jiti kóńil bóledi».
Memleket basshysy qaza tapqandardyń jaqyndaryna kóńil aıtyp, jaraqat alǵandardyń tezirek jazylyp ketýin tiledi. Ol el úkimetiniń mert bolǵandardy jerleýge daıyndyq sharalaryn qolǵa alyp, jedel járdem qyzmetterin tolyqtaı jaraqat alǵandardy emdeýge jumyldyratynyn aıtty. Sondaı-aq qajet adamdarǵa memlekettik qyzmetshiler jekeleı de kómek kórsetedi.
«Qazir eń bastysy apattyń sebep-saldaryn anyqtap, onyń qaıtalanýynyń aldy alý»,-dedi ol.
«Biz bul apattyń shyǵý sebebin jan-jaqty tekserip, endi onyń ekinshi qaıtalanbaýy úshin júıeli ózgerister engizemiz».
Prezıdent sondaı-aq İshki ister mınıstri men ózge de quzyrly organdarǵa Helloýın merekesin toılaý oqıǵalarynyń barlyǵyn, sondaı-aq ózge de festıváldardyń sátti ótýi men qaýipsizdigin qamtamasyz etý úshin jedel tekserý júrgizýdi tapsyratynyn aıtty.
Málimdemesinen soń prezıdent birden apat bolǵan jerge baryp, artynan úkimettiń jaýapty májilisine tóraǵalyq etý úshin Seýldiń ortalyǵyndaǵy úkimet keshenine ketti.
Ol sondaı-aq barlyq úkimettiń mekemelerge týlardy túsirý týraly buıryq berdi.
Aıta keteıik, osyǵan deıin Seýldegi Helloýın merekesinde 120-dan astam adamnyń qaza bolǵanyn jazdyq.