QR SİM resmı ókili Aıbek Smadıarov Ońtústik Koreıada qazaqstandyqtardy jumystan shyǵaryp jatqany jaıly aqparattyń jalǵan ekenin málimdedi.
Buǵan deıin áleýmettik jelide Ońtústik Koreıada jumys isteıtin otandastarymyz jumystan shyǵarylyp jatqany týraly aqparat jarıalandy, dep habarlaıdy Almaty-akshamy.kz Ulysmedia.kz-ke silteme jasap.
«Bul – jalǵan aqparat», - dep jaýap berdi Aıbek Smadıarov.
Sondaı-aq SİM resmı ókili Ońtústik Koreıa shekarasyn zańsyz kesip ótken eki qazaqstandyqtyń taǵdyryna qatysty jergilikti polısıadan habar kútip otyrǵanyn jetkizdi.
Eske sala ketsek, budan buryn Inchhon áýejaıynan Qazaqstannyń eki azamaty qashyp shyǵyp, olardyń bireýi ustalǵany habarlanǵan bolatyn. Keltirilgen aqparatqa súıensek, Inchhon áýejaıynan Qazaqstannyń eki azamaty qashyp, qalaǵa kirmek bolǵan. Olardyń biriniń esimi Nursultan Yrysbaev, al ekinshisi Ýmıjan Narzýllaev ekeni aıtylady. Keıin Ýmıjan Narzýllaev (2002 jylǵy) Tedjon qalasynda ustalǵany habarlanǵan. Tedjon halyq aralyq polısıasy qashqyndy GS25 dúkeninde telefonyn qýattap otyrǵan jerinen qamaýǵa alǵan.
Keıin Qazaqstan Syrtqy ister mınıstrliginiń resmı ókili Aıbek Smadıarov Ońtústik Koreıaǵa kirýge tyıym salynǵanyna qaramastan atalǵan elge zańsyz kirip ketken otandasymyzǵa izdeý jarıalanǵanyn málim etti.
Ońtústik Koreıa bıligi izdeýdegi qazaqstandyqty ustap bergen adamǵa 10 mln teńge syıaqy beriletinin jarıalaǵan.
29 naýryzda Nursultan Yrysbaevtyń polısıaǵa óz erkimen berilgeni belgili boldy.