Elde 65 jáne odan joǵary jastaǵy adamdardyń sany 10,24 mıllıonǵa jetti.
Birikken Ulttar Uıymynyń baǵalaýy boıynsha bul eń joǵary kórsetkish. Al buǵan bılik qatty alańdaýly. Óıtkeni Ońtústik Koreıa týý kórsetkishi eń tómen el, dep habarlaıdy aqshamnews.kz 24.kz-ke silteme jasap.
Ońtústik Koreıadaǵy qart adamdar eldegi 51,22 mıllıon halyqtyń 20 paıyzyn quraıdy. Birikken Ulttar Uıymy 65 jáne odan joǵary jastaǵy adamdar sany 7 paıyzdan asatyn elderdi qartaıǵan qoǵam, 14 paıyzdan asatyn elderdi qarttar qoǵamy al 20 paıyzdan asca óte qart qoǵam sanatyna jatqyzady. Ári byltyrdan beri 0,72 kórsetkishpen týý deńgeıi eń tómen elderdiń qatarynda turǵan Ońtústik Koreıada áleýmettik-ekonomıkalyq sebepterge baılanysty týý kórsetkishi azaıyp barady.
Lı San Lım, Koreıa ulttyq ýnıversıtetiniń doktory:
-Týý deńgeıiniń 0,72-ni kórsetýi – buryn-sońdy bolmaǵan kórsetkish. Osyǵan uqsas jaǵdaılar 1990 jyly Germanıanyń qaıta birigýi kezinde de oryn aldy. Ol kezde týý kórsetkishi 0,77-ge deıin tómendedi. Sondaı-aq Eýropadaǵy toqyraý jyldarynda Vena sıaqty iri qalalarda bir áıel bir baladan artyq týmaıtyn. Al Ońtústik Koreıadaǵy qazirgi jaǵdaıdyń ereksheligi - toqyraý emes ekonomıkamyz turaqty kezde osyndaı jaǵdaıdyń oryn alýy.
Týý kórsetkishiniń tómendeýi, jańa otbasylar sanynyń azdyǵyna baılanysty. Bul úrdis ekonomıkasy damyǵan elder úshin qalypty jaıt. Er adamdar otbasy qurýdaǵy jaýapkershilikten qashsa, qyzdar balaly bolýdan góri mansapty oılaıdy. Óıtkeni turǵyn úı baǵasynyń kún sanap ósýi men bala kútimine ketetin shyǵynǵa bas qatyrǵysy kelmeıdi deıdi, sarapshylar.
Lı San Lım, Koreıa ulttyq ýnıversıtetiniń doktory:
Bul oqıǵalar saıası qateliktermen tikeleı baılanysty. 2010 jyldan bastap memleket jyljymaıtyn múlik naryǵyn yntalandyrý úshin nesıeni eń joǵary somaǵa deıin kóterdi. Saldarynan turǵyn úı men jaldamaly páter baǵasy sharyqtap ketti. Osy kezde qoǵam ishinde smartfondar men áleýmettik jelilerdiń tanymaldylyǵy artty. Jastar ózderiniń ómir súrý saltyn basqalarmen salystyra bastady, básekelestiktiń jańa túri paıda boldy. Osylaısha olar bala týýǵa úlken másele retinde qarady.
Bılik keıingi 15 jyl boıy týý kórsetkishin kóterý úshin 200 mıllıardtan astam qarajat jqmsady. Biraq nátıjesiz. Bıyl el boıynsha tótenshe jaǵdaı jarıalanyp, úkimetke demografıalyq daǵdyrysty bir qalypqa keltirýge tapsyrma berildi. Sarapshylar jyl sońynda kórsetkish 0,68 paıyzǵa deıin tómendeıdi dep boljaıdy. Eger bılik tarapynan jasalatyn sharalar kúsheıtilmese, ǵasyr sońynda halyq sany 2 ese qysqarýy múmkin.