Bul týraly Májilis tóraǵasy Erlan Qoshanov aıtty.
Sıfrlyq kodeks jobasy aıasynda jalǵan aqparattyń taralýyna zańnamalyq turǵydan tosqaýyl qoıylmaq, dep habarlaıdy aqshamnews.kz
"Keshe Úkimettiń keńeıtilgen otyrysynda Memleket basshysy Qasym-Jomart Kemeluly Toqaev ótken jyldyń áleýmettik-ekonomıkalyq damý nátıjelerin qorytyndylap, jańa mindetter qoıdy. Memleket basshysy ekonomıkalyq damýdyń birqatar kórsetkishi boıynsha oń serpin bar ekenin atap ótip, aldaǵy bes jylǵa arnalǵan jumystyń basty baǵyttaryn aıqyndap berdi. Ol – iri ınfraqurylymdyq jobalar, sıfrlandyrý men jasandy ıntellekt, atom energetıkasyn damytý, agroónerkásiptik keshendi nyǵaıtý, ınvestısıa tartý. Árıne, bul mindetterdi oryndaý úshin zaman talabyna beıimdelgen berik zańnamalyq negiz qajet", - dedi Májilis spıkeri.
Onyń sózinshe, Memleket basshysy Parlamentke jer qoınaýyn paıdalaný quqyqtaryn bólý kezinde ınvestorlarǵa túsinikti ári ashyq quqyqtyq baza qurý týraly tapsyrma berdi.
"Qazirgi ýaqytta depýtattardyń bastamasymen ázirlengen jer qoınaýyn paıdalaný týraly zań jobasy qaralyp jatyr. Endi bastamashy depýtattar elimizge iri geologıalyq barlaý kompanıalary kelýine neǵurlym qolaıly jaǵdaı jasaý máselesine muqıat nazar aýdarýy qajet. Bul oraıda ozyq elderdiń tájirıbesin barynsha zerdelep, jumysty sesıa sońyna deıin aıaqtaýymyz kerek", - dedi Qoshanov.
Memleket basshysy nazar aýdarǵan taǵy bir mańyzdy másele – sıfrlandyrý.
"Birikken Ulttar Uıymy bergen baǵa boıynsha, Qazaqstan búgingi tańda osy salada eleýli jetistikke jetip otyr. Elimiz 193 memleket arasynda 24-shi orynda. Sondaı-aq onlaın-qyzmetter ındeksi boıynsha úzdik 10 el qataryna kiredi. Máselen, ınternet arqyly memlekettik qyzmetterge qol jetkizý deńgeıi 92 paıyzǵa jetti. Alaıda mundaı progrestiń ekinshi jaǵy da bar. Sıfrlandyrýmen birge halyqqa jalǵan aqparat taratý beleń alyp, alaıaqtyqtyń nebir túri qarqyndy damyp kele jatyr. Qazaqstandyqtar kún saıyn osyndaı jaǵymsyz jaıttarǵa tap bolýda. Birneshe depýtattyq saýaldyń osy problemaǵa arnalǵany beker emes. Qazirgi jaǵdaıda bul máselege jan-jaqty qaraý kerek. Eń aldymen, zań men tártipti saqtaýǵa baǵyttalǵan sharalar qabyldaý qajet. Máselen, alda qaralatyn Sıfrlyq kodeks jobasy sheńberinde elimizdiń turaqtylyǵyna nuqsan keltiretin jalǵan aqparattyń taralýyna zańnamalyq turǵydan tosqaýyl qoıýǵa tıispiz. Sonymen qatar, destrýktıvti kontent taratqany úshin ınternet-platformalardyń jaýapkershiligin qarastyrǵan jón", - dep atap ótti ol.
Erlan Qoshanov jasandy ıntellektini engizý jónindegi jumysty jalǵastyrý qajettigin aıtty.
Májilis qabyrǵasynda tıisti zań jobasy ázirlendi. Jaqyn arada osy zań jobasyn talqylaý jumysy bastalady.