Qazaqstan Respýblıkasynyń Memlekettik keńesshisi Erlan Qarın óziniń telegram paraqshasynda bıylǵy 5 qarashada elimizde alǵash ret ótkizilgen aýdan jáne oblystyq mańyzy bar qala ákimderiniń saılaýyna qatysty pikir bildirip, jazba qaldyrdy.
«Qazaqstanda tuńǵysh ret aýdan jáne oblystyq mańyzy bar qala ákimderi saılandy. Ózderińizge málim, aýyl ákimderin saılaý 2 jyldan beri ótkizilip keledi (sodan beri 1700-ge jýyq ákim saılandy). Aýdan ákimderiniń saılaýy qoǵamda zor qyzyǵýshylyq týǵyzdy. 45 ákim laýazymyna 125 úmitker talasty. Olardyń qatarynda túrli salanyń ókilderi – ekonomıser, zańgerler, oqytýshylar, ınjenerler, aýyl sharýashylyǵy jáne basqa da sala mamandary boldy. 7 saıası partıanyń bári aýdan ákimderiniń saılaýynda óz úmitkerlerin usyndy. 1 497 saılaý ýchaskesinde kandıdattar senim bildirgen tulǵalar, baıqaýshylar jáne buqaralyq aqparat quraldarynyń ókilderi, barlyǵy 8500-ge jýyq adam baıqaý júrgizdi. Ótken saılaý – Ortalyq Azıa aımaǵyndaǵy alǵashqy osyndaı saıası tájirıbe. Osylaısha Prezıdent Qasym-Jomart Toqaevtyń saıası reformalary óńirdegi saıası jańǵyrtý isiniń jańa baǵdaryn aıqyndaýda», – dep tujyrymdaǵan Memlekettik keńesshi.