Almatynyń Oqýshylar saraıynda 60 myńnan astam oqýshyny bir aı ishinde robototehnıkany, drondardy basqarýǵa úıretý jáne ózge úıirmelerge qatysý qoljetimdi bolady, dep habarlaıdy Almaty-akshamy.kz
Oqýshylar saraıy búginde óz damýynyń jańa kezeńine ótýde. Almaty ákimdiginiń qoldaýymen jobalyq keńse aıasynda osynaý qosymsha bilim berý mekemesi óz tarıhynda aýqymdy modernızasıalanýdyń eki kezeńin iske asyrdy jáne óz qyzmetin keńeıtti. Nysannyń alańy 35 myń sharshy metrden asady.
Qala oqýshylary úshin zymyran jasaý jáne aeroortalyq, planetarıı, VR jáne drondardy basqarý zerthanasy, fızıka, hımıa, bıologıa jáne gıdroponıka boıynsha ǵylymı zerthanalar, sondaı-aq robot jasaý, IT-baǵdarlamalaý jáne basqa da ushyrý alańdary boıynsha úıirmeler ashyldy. Sondaı-aq, sporttyq, kórkemdik, áleýmettik-pedagogıkalyq baǵyttaǵy jańa úıirmeler iske qosyldy.
Bul paıdaly úıirmeler endi aptasyna 15 myńnan astam almatylyq oqýshyny, al kúnine 3000 – ǵa jýyq balany qabyldaı alady. Modernızasıalanýdan keıingi Oqýshylar saraıynyń jobalyq qýaty osyndaı.
Aıta keterligi, Oqýshylar saraıy 1983 jyly salynǵan tarıhı mańyzy bar sáýlet nysany bolyp tabylady.
2019 jyly Almaty ákimdiginiń qaýlysyna sáıkes Oqýshylar saraıyna týrıser men natýralıser stansıalary, №12 balalar mýzykalyq mektebi jáne №4 jaz balalar mýzykalyq mektebi ózderiniń materıaldyq bazasymen jáne qarjylandyrýymen qosyldy.
Ótken jyly Almaty ákimi Erbolat Dosaevtyń tapsyrmasymen skverdi abattandyrý jumystary aıaqtaldy. Syrtqy jaryqtandyrý aýystyryldy, jańa aǵashtar men gúlzarlar otyrǵyzyldy, kógaldandyrý júrgizildi, sýarý júıesi tartyldy, jabyndylar tóseldi. Sondaı-aq jańa oryndyqtar men ýrnalar ornatylyp, sýburqaq salyndy.