Á.Qasteev atyndaǵy QR Memlekettik óner mýzeıinde Qazaqstan Respýblıkasynyń Eńbek sińirgen qaıratker, álemge áıgili koleksıa jıýshy, mesenat, aqyn, jazýshy Azat Ákimbektiń jeke koleksıasynan, 75 jyldyq mereıtoıyna arnalǵan «Orta Azıa uıǵyr sýretshileriniń týyndylary (keskindeme, grafıka)» atty kórme ashylady.
Azat Ákimbek – 1972 jyldan bastap búginge deıin Shyǵys Túrkistan, Qashqar, Hotan, Týrfan, Kýchar, Aqsý jáne basqa da qalalardyń sheberleri jasaǵan uıǵyr halyq-qoldanbaly óneriniń biregeı jınaǵyn jınaı aldy. Elimizdi qosqanda, shetelderde 74 kórmesi ótken.
Qazaqstanda uıǵyr beıneleý óneriniń damý tarıhyn biregeı dep ataýǵa bolady. Uıǵyr halqy qazaq jerinde birneshe urpaq boıy ómir súrip kele jatqan úlken topty quraıdy. Uıǵyrlardyń kórkemdik mádenıetiniń ereksheligi – dástúrli uıǵyr ónerin qurmetpen saqtap, olardy zamanaýı sándik-qoldanbaly, mýzykalyq jáne bı salasynda damytý. Uıǵyrlar arasynda kásibı beıneleý óneriniń bastaýy zańdy túrde Avakrı Shamsıge (Ábýbákir Shamsýtdınov (1903–1987), al qazaqtar arasynda Ábilhan Qasteevke tıesili.
Kórmege uıǵyr sýretshileriniń 70-ten astam týyndysy qoıylady. Olardyń barlyǵy da shyǵarmashylyq alańynda belsendilik tanytyp júrgen álemge áıgili sheberler. Kásibı bilim alǵan, elge tanylǵan bul sýretshilerdiń býyny, Almaty men Almaty oblysynyń týmalary.
Kórermen nazaryna kásibı ónerde – keskindeme men grafıka salasynda jumys istegen jáne búgin de jumysyn jalǵastyryp júrgen sýretshiler: Ózbekstannyń halyq sýretshisi, Ózbekstan óner akademıasynyń akademıgi Medat Kagarovtyń, Kanna (Fransıa) halyqaralyq kórmesiniń altyn medaliniń ıegeri Abdýkarım Isanyń, Qazaqstan Dızaınerler odaǵynyń múshesi, QazBSQA dızaın fakúltetiniń profesory Arken Zýlfıkardyń, Ózbekstannyń halyq sýretshisi, Ózbekstan Óner akademıasynyń akademıgi, Reseı Óner akademıasynyń qurmetti akademıgi Lekım Ibragımovtyń, Qyrǵyzstannyń eńbek sińirgen mádenıet qyzmetkeri Sábıt Babadjanovtyń, QR Eńbek sińirgen óner qaıratkeri, Qazaqstan óner akademıasynyń akademıgi Ahmet Ahattyń, QHR SÝAR óner akademıasynyń prezıdenti Kerım Nasırdınniń jáne taǵy basqa da qylqalam sheberleriniń biregeı týyndylary usynylady.
– Zamanaýı uıǵyr sýretshileriniń shyǵarmashylyq negizine úılesimdilik, ómirge degen meıirimdi kózqaras, onyń qundylyǵy men qýanyshyn sezine bilý, óziniń tarıhy men mádenıetin maqtan tutý, kúndelikti ómirden qarapaıym baqytty kórý qabileti olarǵa gýmanısik serpilisti jetkizetin týyndylar jasaýǵa múmkindik beredi, – deıdi mýzeıdiń «Shetel klasıkalyq óneri» sektorynyń jetekshisi A.Aıdymbaeva.