Ústimizdegi jyly 12 naýryz saǵat 18.00-de Abaı atyndaǵy Ulttyq opera jáne balet teatrynyń úlken sahnasynda opera trýppasynyń solısi, QR Eńbek sińirgen qaıratkeri Dına Dútmaǵambetovanyń «Óner – meniń ómirim» atty shyǵarmashylyq keshi ótedi, dep habarlaıdy Almaty-akshamy.kz
Dına Dútmaǵambetova – Abaı atyndaǵy Ulttyq opera jáne balet teatrynyń opera trýppasynyń jarqyn ókili. Qurmanǵazy atyndaǵy Qazaq ulttyq konservatorıasynyń túlegi, kóptegen respýblıkalyq jáne halyqaralyq baıqaýlar men festıválderdiń laýreaty. Ol sahnada eń kúrdeli de alýan túrli keıipkerlerdi – «Karmen» operasyndaǵy názik Mıkaellany, Dj.Pýchchınıdiń attas operasyndaǵy ámirshil Týrandotty, E.Brýsılovskııdiń «Qyz Jibek» operasyndaǵy meıirban ári kóńildi Batsaıyny beıneleıdi. Ol lırıkalyq qaharmandardyń beınesinen taǵdyr sheshetin óktem keıipkerlerdiń beınesine ońaı aýysady. Dına Dútmaǵambetovanyń repertýarynda tolyq operalyq partıalardan basqa mono-operalar da, kameralyq shyǵarmalar sıkldary da bar. Ol repertýaryna taǵy bir marjan qosý úshin jańa mýzykaǵa árdaıym qyzyǵýshylyqpen enedi.
«Bas dırıjerimiz, Qazaqstan Respýblıkasynyń eńbek sińirgen qaıratkeri Erbolat Ahmedıarov jetekshilik etetin sımfonıalyq orkestrdiń áýenimen biz kórermender úshin konserttik baǵdarlama daıyndadyq, oǵan sheteldik jáne orys klasıkteriniń áıgili operalyq qoıylymdarynan sırek oryndalatyn arıalar, sondaı-aq teatrymyzdyń sahnasynda uzaq jyldar boıy qoıylyp kele jatqan jáne «Altyn mura» repertýaryna engen qazaq avtorlarynyń shyǵarmalary kiredi», – deıdi Dına Dútmaǵambetova.