Bank qarjy naryǵynyń turaqtylyǵyn qamtamasyz etý sharalaryn qabyldaýdy jalǵastyrady.
Qazaqstan Respýblıkasy Ulttyq Bankiniń Aqsha-kredıt saıasaty jónindegi komıteti bazalyq mólsherlemeni +/– 1,00 p.t. paıyzdyq dálizimen jyldyq 13,50% deńgeıinde belgileý týraly sheshim qabyldady, dep habarlaıdy Almaty-akshamy.kz.
Tıisinshe ótimdilikti usyný jónindegi turaqty qoljetimdi operasıalar boıynsha mólsherleme 14,50%, al ótimdilikti alý jónindegi turaqty qoljetimdi operasıalar boıynsha mólsherleme 12,50%bolady.
Mólsherlemeni ózgerissiz qaldyrý týraly sheshim onyń aǵymdaǵy deńgeıi Ulttyq Banktiń geosaıası táýekelderdi jáne ınflásıalyq prosesterdiń jedeldeý táýekelin arttyrýǵa yqpal etetinine oraı negizdeldi. Bul rette syrtqy jáne ishki makroekonomıkalyq ahýal budan bylaı da nasharlaǵan jaǵdaıda monetarlyq talaptardy odan ári kúsheıtý úshin keńistik qalady. Ulttyq Bank makroekonomıkalyq jaǵdaıdyń jáne Qazaqstan qarjy naryǵynyń turaqtylyǵyn qamtamasyz etý sharalaryn qabyldaýdy jalǵastyrady.
Inflásıanyń barlyq quramdas bólikteri boıynsha baǵalardyń ósýi aıasynda 2022 jylǵy aqpanda jyldyq ınflásıa 8,7%-ǵa deıin (2022 jylǵy qańtarda – 8,5%) kóterildi.
Azyq-túlik taýarlarynyń baǵasy nan-toqash ónimderi men jarma, kókónisterdiń qymbattaýyna baılanysty 10%-ǵa (osy jylǵy qańtardaǵy 9,9%-dan) kóterildi. Azyq-túlikke jatpaıtyn ınflásıa 8,6%-ǵa deıin(8,5%) ulǵaıdy. Turmystyq tehnıka, jıhaz ben turmysta qoldanylatyn taýarlar baǵasynyń joǵary ósimi saqtalyp otyr. Benzın men dızel otyny baǵalaryn ýaqytsha retteý jaǵdaıynda janar-jaǵarmaı (JJM) naryǵynda dezınflásıa baıqalady. Alaıda JJM baǵasynyń ósýi jyldyq kórsetýde áli de bolsa joǵary mánderde (22,1%) saqtalyp qaldy.
Aqyly qyzmet kórsetý 2021 jylǵy aqpanmen salystyrǵanda bıylǵy aqpanda 7,1%-ǵa (6,8%) qymbattady, ol jekelegen naryqtyq qyzmetke baǵanyń ósýine baılanysty boldy. Turǵyn úıdi jaldaý qunynyń jyldyq ósimi 20,7% boldy. Sonymen qatar baǵa ósýine jarıalanǵan moratorıı aıasynda gazdyń baǵasy 5,4%-ǵa deıin (2021 jylǵy jeltoqsanda – 12,9%) baıaýlaǵany baıqalady.
Syrtqy sektor belgisizdiktiń óte joǵary deńgeıimen sıpattalady. Jahandyq ekonomıka geosaıası táýekelderdiń qysymyna ushyrap otyr. Osyǵan baılanysty bıyl jáne kelesi jyly álemdik ekonomıka buryn boljanǵannan barynsha tómen qarqynmen ósedi dep kútiledi.
Syrtqy naryqtardaǵy jaǵdaı baǵa ósýimen sıpattalady. Energıa tasymalynyń, metal men aýylsharýashylyq ónimderiniń baǵasy kúrt ósýine baılanysty jahandyq ınflásıanyń buryn boljanǵannan joǵary mánderde uzaq ýaqytqa qalý yqtımaly joǵary.
2014 jyldan bastap Brent surypty munaı baǵasy alǵash ret barreline 100 AQSH dollarynan asty. Geosaıası shıelenistiń kúsheıýine baılanysty Reseıden munaı jetkizýdegi irkilis táýekelinen joǵary baǵa qoldaý taýyp otyr. Sonymen birge, joǵary suranys pen 2022 jylǵy qańtardaǵy naqty óndiris ruqsat etilgen kvotalardan tómen bolǵan OPEK+ elderiniń munaıdy barynsha az óndirýi aıasynda álemdik munaı qorlarynyń tómendeýi baıqalady. Álemdegi búgingideı joǵary belgisizdikke qaramastan, jalpy alǵanda, álemdik munaı naryǵynyń budan bylaıǵy damý perspektıvasy pozıtıvti bolyp qalyp otyr.
Bıylǵy aqpanda FAO azyq-túlik baǵasynyń ındeksi ósimdik maıy, sút ónimderi, astyq jáne et baǵalarynyń aıtarlyqtaı ósýi aıasynda tarıhı rekordtyq deńgeıge jetti.Reseı-Ýkraına qaqtyǵysy álemdik naryqta bıdaıdyń tapshylyǵyna ákelip soǵady degen qaýip-qaterge baılanysty bıdaı quny 14 jyldyq eń joǵary kórsetkishti jańartty.
Saýda áriptes elderindegi kúrt ózgerip jatqan geosaıası jáne syrtqy ekonomıkalyq jaǵdaı men buryn-sońdy bolmaǵan belgisizdik deńgeıi boljamdardy tolyqqandy daıyndaý múmkindikterin edáýir qıyndatyp otyr. Osyǵan baılanysty Ulttyq Banktiń boljamdary saraptamalyq baǵalaýmen tolyqtyryldy jáne negizgi makroekonomıkalyq kórsetkishterdiń yqtımal baǵytyn sapaly baǵalaý úshin qalyptastyryldy.
Ulttyq Banktiń baǵalaýy boıynsha, ınflásıa aldyńǵy boljamdardan joǵary bolyp qalyptasatyn bolady. Inflásıanyń barynsha joǵary serpininiń negizgi sebebi azyq-túlikke jatpaıtyn taýarlardy tutynýdaǵy ımporttyń joǵary úlesine baılanysty teńgeniń aıyrbastaý baǵamynyń álsireýin ishki baǵalarǵa aýystyrý bolyp tabylady. Sondaı-aq azyq-túlik pen energıa resýrstary baǵasynyń ósýine baılanysty, birinshi kezekte, Reseıdegi ınflásıanyń kútiletin jedeldeýi jáne álemdegi ınflásıalyq qysymnyń joǵarylaýy aıasynda syrtqy ınflásıa aıasy kúsheıedi degen boljam bar. Osylaısha, 2022 jyldyń qorytyndysy boıynsha nysanaly baǵdardan asyp ketý táýekeli aıtarlyqtaı ósti.
Geosaıası daǵdarysqa baılanysty Qazaqstan ekonomıkasy ósýiniń buryn boljanǵannan da tómen baǵyty kútilýde. Ekonomıkanyń ósý qarqynyna shıkizat taýarlaryna joǵary baǵalar, búdjet shyǵystarynyń áleýetti ósýi, sondaı-aq epıdemıologıalyq jaǵdaıdyń jaqsarýy yqpal etedi.
Bazalyq mólsherleme boıynsha budan bylaıǵy sheshimder ınflásıa serpinine jáne ınflásıalyq kútýlerge, geosaıası jaǵdaıdyń damýyna jáne oǵan qarjy naryqtarynyń yqpal etýine baılanysty bolady. Ulttyq Bank ınflásıany nysanaly mánderge qaıtarý úshin barlyq qajetti sharalardy qabyldaýdy jalǵastyrady.
Qazaqstan Respýblıkasy Ulttyq Bankiniń Aqsha-kredıt saıasaty jónindegi komıtetiniń bazalyq mólsherleme boıynsha kezekti josparly sheshimi 2022 jyly 25 sáýirde Nur-Sultan ýaqyty boıynsha saǵat 15:00-de jarıalanady.