Almatyda óner, bilim jáne ǵylym salasynda eńbek etip júrgen tanymal tulǵalar barsha qazaqstandyqtardy Ulttyq mereke — Respýblıka kúnimen shyn júrekten quttyqtady.
Qazaqstannyń Eńbek eri, kıno salasynyń maıtalmany Asanáli Áshimov Qazaqstan halqyn Respýblıka kúnimen quttyqtap, óner jolynda júrgen azamattardyń qoǵamdaǵy róli týraly aıtty.
«Ár ýaqytta úlken meıram halyq úshin qýanysh. Halyqqa jasaǵan eńbek, óner adamdarynyń halyq úshin qyzmeti ár ýaqytta qundy.
Qut-bereke kelsin. Jaqsylyq kelsin januıalaryńyzǵa, toılaryńyz toıǵa ulassyn. Úlken toıda, úlken jetistikke jetińizder dep búkil Qazaqstan halqyn quttyqtaımyn!»
M.O.Áýezov atyndaǵy Ádebıet jáne óner ınstıtýtynyń dırektory Kenjehan Matyjanov bul kúnniń el tarıhyndaǵy mańyzyna erekshe toqtaldy:
«Bul kún – elimizdiń memlekettik egemendigin jarıalaǵan asa mańyzdy tarıhı sát. Respýblıka kúni ótkenimiz ben búginimizdi, bolashaǵymyzdy baılanystyratyn ardaqty mereke. Egemen elimizdiń tuǵyry bıik, keleshek urpaǵymyz baqytty bolsyn!»
Qazaqstan Jazýshylar odaǵynyń tóraǵasy Mereke Qulkenov merekeniń tarıhı bastaýy men Almaty qalasynyń róline nazar aýdardy:
«1990 jyly 25 qazanda qabyldanǵan Deklarasıa osy Almatyda jarıalanǵan edi. Bul táýelsizdikke bastar alǵashqy qadam boldy. Sondyqtan almatylyqtar bul merekeni erekshe yqylaspen qarsy alady dep senemin. Barsha qazaqstandyqqa jarqyn bolashaq pen amandyq tileımin».
Qazaqstannyń halyq artısi Ramazan Stamǵazy quttyqtaýynda birlik pen beıbitshilik tiledi:
«Búgingi Respýblıka kúni qutty bolsyn! Táýelsiz elimizdiń týy árdaıym bıikke jelbirep, halqymyzdyń eńsesi bıikteı bersin. Elimiz aman, jurtymyz tynysh bolsyn, birligimiz bekem bolsyn! Barshańyzǵa zor densaýlyq, otbasylaryńyzǵa shattyq pen qýanysh tileımin, beıbitshilik ómirde árqashan jasaı bereıik».
Al QR Eńbek sińirgen qaıratkeri Jubanysh Jeksenuly merekeniń rýhanı mánin atap ótti:
«Mártebeli mereke - Respýblıka kúni qutty bolsyn! Elimiz aman, jurtymyz tynysh bolsyn! Eldiń beıbit ómiri, jurttyń erkin tynys-tirshiligi jalǵasyn taba bersin. Aýyzbirshiligimiz nyǵaıa bersin».
Qazaqstannyń halyq artıseri Altynbek Qorazbaev, Dosqan Joljaqsynov, Abaı atyndaǵy opera jáne balet teatrynyń solısi Oleg Tatamırov, sonymen qatar óner jolyna jańa qadam basqan jas artıser men zıaly qaýym ókilderi Respýblıka kúniniń el birligi men táýelsizdik ıdeıasyn ulyqtaıtyn, halyqty ortaq múdde men ıgi tilekke úndeıtin mereke ekenin atap, otandastarymyzdy merekemen quttyqtady.