Almaty qalasy boıynsha Qylmystyq-atqarý júıesi departamentinde Respýblıka kúnine arnalǵan saltanatty jıyn ótti.
İs-shara elimizdiń Memlekettik Ánuranymen ashylyp, departament bastyǵy Erlan Uzaqov jeke quram men ardagerlerdi ataýly merekemen quttyqtady.
– 25 qazan – elimizdiń eń mańyzdy ári aıryqsha merekeleriniń biri. Sebebi dál osy kúni, 1990 jyly, Qazaq KSR Joǵarǵy Keńesi Memlekettik egemendik týraly deklarasıany qabyldap, Qazaqstan ózindik salt-dástúri men ulttyq qundylyqtary bar egemendi Respýblıka retinde jarıalandy. Bul – ata-babalarymyz ańsaǵan azattyqtyń aq tańy atqan kún. Búgingi býynnyń mindeti – sol táýelsizdikti kózdiń qarashyǵyndaı saqtap, el ıgiligi úshin adal qyzmet etý. Barshańyzdy Respýblıka kúnimen shyn júrekten quttyqtaımyn, – dedi Erlan Uzaqov.
Merekelik jıynda qyzmettik mindetin adal atqaryp, joǵary kásibılik tanytqan úsh qyzmetker İshki ister mınıstrliginiń jáne qylmystyq-atqarý komıtetiniń Alǵys hattary men Gramotalarymen marapattaldy. Al bir qyzmetkerge "Qylmystyq-atqarý salasynyń úzdigi" tósbelgisi tabys etildi. Sonymen qatar jıyrmadan astam qyzmetker QAJ departamenti basshylyǵynyń Alǵys hattaryna ıe boldy.
Saltanat aıasynda erekshe dástúr retinde adal da eńbekqor qyzmetkerler tárbıelegen 10 ata-anaǵa Erlan Uzaqovtyń atynan Alǵys hattar men gúl shoqtary tapsyryldy. Alǵys hat mátininde: "Siz tárbıelep ósirgen ulyńyz QR İİM Qylmystyq-atqarý organdarynda ózine júktelgen mindetterdi adal atqaryp, Otan aldyndaǵy boryshyna zor jaýapkershilikpen qaraýda. Ulyńyzdyń boıyna osyndaı qasıetterdi darytqanyńyz úshin Sizge shynaıy alǵys bildiremin" - delingen. Sonymen birge is-shara barysynda qyzmetke jańadan qabyldanǵan jas mamandar Otanǵa adal qyzmet etýge saltanatty túrde ant berdi.