Óńdeý ónerkásibi órkendeı me?

QR Premer-Mınıstri Álıhan Smaıylovtyń tóraǵalyǵymen ótken Úkimet otyrysynda elimizdiń óńdeý ónerkásibin odan ári damytý  sharalary qaraldy.

8 aıdyń qorytyndysy boıynsha Aqmola oblysynda óńdeý ónerkásibine tartylǵan ınvestısıa kólemi 70%-ǵa, Aqtóbe jáne Ulytaý oblystarynda óndiris kóleminiń 18%-ǵa tómendegen. Óńir ákimderi Marat Ahmetjanov, Asqat Shaharov jáne Berik Ábdiǵalıuly máselege qatysty túsinikteme berdi, dep habarlaıdy almaty-akshamy.kz. 

Baıandamashylardy tyńdaǵan Álıhan Smaıylov Memleket basshysy Joldaýynda elimizdiń myqty ónerkásiptik negizin qalyptastyrýdy eń basty mindet retinde aıqynǵanyn eske saldy. Bul rette kez kelgen memlekettiń ekonomıkasynda óńdeý ónerkásibi erekshe oryn alady.

«Indýstrıalandyrý kartasy aıasynda bıyl tamaq ónerkásibinde, qurylys ındýstrıasynda, mashına jasaýda, metalýrgıada jáne basqa salalarda 170 jobany iske qosý josparlanǵan. Bul shamamen 12,5 myń turaqty jumys ornyn qurýǵa múmkindik beredi», — dep atap ótti Premer-Mınıstr.

Sondaı-aq Memleket basshysynyń tapsyrmasy boıynsha Mashına jasaý salasyn damytý jónindegi keshendi jospardyń jobasy daıyndalýda.

«Ony iske asyrý osy saladaǵy óndiristi 2 eseden astam, eksport kólemin 3 esege, negizgi kapıtalǵa salynatyn ınvestısıany 1,5 esege arttyrýǵa múmkindik beredi», — dedi Álıhan Smaıylov.

Bıyl Jeńil ónerkásipti damytýdyń jol kartasyn ózektendirý jumystary aıaqtalady.

«Jalpy, óńdeý sektoryn damytý boıynsha barlyq negizgi baǵyttar men mindetter belgilendi. Endi olardy belsendi túrde iske asyrýdy qamtamasyz etý qajet», — dep atap ótti Premer-Mınıstr.