Akademıalyq mártebe óner ordasy qyzmetkerleriniń jalaqysyn retteýge múmkindik beredi.
Qazaqstan úkimeti Jambyl atyndaǵy Qazaq memlekettik fılarmonıasy men Roza Baǵlanova atyndaǵy "Qazaqkonsert" memlekettik konserttik uıymyna "akademıalyq" mártebe berýdi josparlap otyr. Bul týraly Ashyq NQA portalynda jarıalanǵan úkimet qaýlysynyń jobasynan belgili boldy, dep habarlaıdy almaty-akshamy.kz.
"QR Mádenıet jáne aqparat mınıstrliginiń "Jambyl atyndaǵy Qazaq memlekettik fılarmonıasy" respýblıkalyq memlekettik qazynalyq kásipornyna jáne "Roza Baǵlanova atyndaǵy "Qazaqkonsert" memlekettik konserttik uıymy" respýblıkalyq memlekettik qazynalyq kásipornyna "Akademıalyq" mártebe berilsin", – delingen qaýly jobasynda.
Mádenıet jáne aqparat mınıstrliginiń túsindirme jazbasyna sáıkes, qos óner ordasy da klasıkalyq mýzyka óneri salasynda jetekshi bolyp tabylatyn, ulttyq mádenıeti men ónerin qalyptastyrýǵa, damytýǵa jáne nasıhattaýǵa eleýli úles qosyp kele jatqan mekemeler.
Qujat jobasyn jarıa talqylaý merzimi – 16 qazanǵa deıin.