Bıyl Almaty qalasy boıynsha kovıdke shaldyqqan turǵyndardy medısınalyq ońaltýdan ótkizýge 178,3 mln teńge qarastyrylǵan. Bul týraly Medısınalyq saqtandyrý qorynyń Almaty qalalyq fılıalynyń ókilderi habarlady.
Fılıal dırektory Tileýhan Ábildaevtyń aıtýynsha, búgingi kúnge deıin medısına uıymdarymen 85,5 mln teńgeniń kelisimsharty bekitilgen. Bul somaǵa 2584 postkovıdtik saýyqtyrý qyzmeti kórsetilýge tıis.
«Koronavırýspen jáne pnevmonıanyń ortasha nemese aýyr túrlerimen aýyrǵan almatylyqtardyń reabılıtasıadan ótýge múmkindigi bar. Olar postkovıdtik ońaltýdan kúndizgi jáne táýlik boıǵy stasıonarlarda óte alady», – dedi Tileýhan Ábildaev.
Medısınalyq kómekti paıdalaný úshin tirkelgen emhanadaǵy ýchaskelik dárigerden reabılıtolog-mamanǵa joldama alý qajet. Dárigerler syrqattyń jaǵdaıyna qaraı densaýlyqty qalpyna keltirý josparyn jasap, emdeý kýrsynyń merzimin bekitedi.
Biraq medısınalyq reabılıtasıadan ótý úshin pasıent mindetti túrde saqtandyrylǵan bolýy shart. Sonymen qatar, medısınalyq saqtandyrý qory postkovıdtik ońaltý qyzmetin kórsetetin klınıkalar sanyn arttyrýǵa kúsh salyp keledi.
«MSQ reabılıtasıa qyzmetin kórsetetin klınıkalar sanyn arttyrýǵa, bul salaǵa jekemenshik klınıkalardy tartý baǵytynda jumys júrgizip keledi. Aımaqtyq komısıa atalǵan qyzmet túrine turaqty konkýrs jarıalap otyrady», – dedi Tileýhan Ábildaev.
Taqyrypqa oraı aıta ketsek, byltyr Almaty qalasy boıynsha postkovıdtik ońaltý qyzmetine 222,4 mln teńge jumsalǵan bolatyn.