Ǵalymdar aldaǵy 10 jylda kúlli álem boıynsha dúnıege keletin qyzdar qarasy 4,7 mln-ǵa azaıatynyn alǵa tartyp otyr.
Ǵalymdardyń aıtýynsha, bul qubylys ul balaǵa artyqshylyq berýmen baılanysty, dáliregi, ul balany artyq kóretin jańsaq kózqaraspen baılanysty.
Bul baǵytta halyqaralyq deńgeıde jasaqtalǵan ǵalymdar toby sońǵy 50 jylda týǵan 3 mlrd balanyń derekterin saraptamadan ótkizgen eken. Atap aıtqanda, zertteýshiler 1970 jyldan beri erler men áıelderdiń araqatynasy ulǵaıǵan 12 eldiń, sondaı-aq, áleýmettik nemese mádenı tendensıalar arqyly araqatynasy artýy múmkin 17 eldiń týý kórsetkishterin taldady, dep habarlaıdy Almaty-akshamy.kz Islam.kz-ke silteme jasap.
Statısıkalyq derekterge negizdelip ázirlengen senarılerdiń birine sáıkes 2030 jylǵa qaraı bul elderde 4,7 mıllıon qyz kem dúnıege keledi. Ekinshi senarı boıynsha osy kúngi qalyptasqan tendensıalar saqtalsa, bul kórsetkish 2100 jylǵa qaraı álem boıynsha 22 mıllıonnan asýy múmkin. Zertteý avtorlary erler sany artqan saıyn qoǵamda zorlyq-zombylyq sekildi jat ádetterdiń kóbeıýine ákelýi múmkin ekenin eskertti. Sonyń ishinde sońǵy 40 jylda Eýropanyń ońtústik-shyǵys elderinde, sondaı-aq, Azıanyń ońtústigi men shyǵysyndaǵy elderde beı-bereket jynystyq qatynasqa baılanysty túsik jasatqandar qarasy kúrt artyp keledi.