Veıpter men shegilmeıtin temeki ónimderin ákelý, óndirý, satý jáne taratý úshin qylmystyq jaýapkershilikti engizý týraly zań jobasy Parlament qaraýynda.
İİM shegilmeıtin temeki ónimderin zańsyz satý men taratý úshin jaýapkershilik baryn eske saldy, – dep habarlaıdy almaty-akshamy.kz Polisia.kz-ke silteme jasap.
İİM resmı ókili Shyńǵys Alekeshevtiń aıtýynsha, «Zań men Tártip» qaǵıdatyn qamtamasyz etý maqsatynda İshki ister organdary qoǵammen birlesip, 18-31 naýryz aralyǵynda respýblıkalyq jedel-profılaktıkalyq is-sharasyn ótkizedi. Aksıa barysynda halyqqa nasybaıdy tutynýdyń zardaby jáne kásipkerlerge ony satýǵa jol bermeý týraly quqyqtyq túsindirý jumystary júrgiziletin bolady.
«Qazirgi ýaqytta «Halyq densaýlyǵy jáne densaýlyq saqtaý júıesi týraly» kodeksinde shegilmeıtin temeki ónimderin, onyń ishinde nasybaıdy ákelýge, óndirýge, satýǵa jáne taratýǵa tyıym salý kózdelgen. Shegilmeıtin temeki ónimderin zańsyz satqany úshin 25 AEK nemese 92 myń teńgeden astam mólsherde aıyppul kózdelgen», – dedi Shyńǵys Alekeshev.
Saýda erejelerin buzý faktileri anyqtalǵan jaǵdaıda kináli tulǵalar jaýapqa tartylatyn bolady.
«Veıpter men shegilmeıtin temeki ónimderin ákelý, óndirý, satý jáne taratý úshin qylmystyq jaýapkershilikti engizý týraly zań jobasy Qazaqstan Respýblıkasy Parlamentiniń qaraýynda ekenine nazar aýdaramyn. Qurmetti azamattar, atalǵan shara birinshi kezekte ult bolashaǵy – jastardyń densaýlyǵyn saqtaýǵa baǵyttalǵan», – dedi departament bastyǵy, İİM resmı ókili.
Eske salaıyq, 15 naýryzda Atyraýda ótken Ulttyq quryltaıdyń úshinshi otyrysynda Prezıdent Qasym-Jomart Toqaev sóz sóıledi. Memleket basshysy qazaqstandyqtardyń densaýlyǵyna zıan keltiretin esirtki men basqa da zattardyń, sonyń ishinde nasybaıdyń zıany týraly aıtty.