Balalardyń emosıalyq jaı-kúıimen jumys isteý óte mańyzdy
Býllıngti qalaı anyqtaýǵa bolady, ata-analar ne isteý kerek, máseleni sheshýdiń joldary qandaı, bul jóninde Óńirlik komýnıkasıalar alańynda psıhologıa magıstri, Qazaqstan psıhologtary qaýymdastyǵynyń múshesi, balalar psıhology, mektepterdegi daǵdarystyq jaǵdaılardy sheshý jónindegi maman Anastasıa Steblánko baıandady, dep habarlaıdy Almaty-akshamy.kz.
Mamannyń aıtýynsha, býllıngti jıi konflıktpen shatastyrady. Bul býllıngtiń der kezinde tanylmaı, máseleniń odan saıyn ushyǵýyna ákep soǵýy múmkin.
«Býllıng pen konflıkttiń aıyrmashylyǵy nede? Ádette birinshi jaǵdaıda eki tarap teń bolmaıdy – álsiz tarap jáne kúshtisi bolady. Ádette, kúshi basym tarapta bir adam, birneshe adam bolýy da sırek emes. Iaǵnı, eń birinshi aıyrma – kúshter teńsizdigi. Ekinshiden, býllıngtiń naqty bastalý jáne aıaqtalý merzimi bolmaıdy. Býllıng epızodtary ártúrli ýaqyt aralyǵynda qaıtalanyp turady. Bul jaıtty eresek adam nemese jasóspirimder ýaqytynda býllıng ekenin tanyp, este saqtaýy tıis. Býllıng - zorlyq-zombylyqtyń túri jáne ol psıhologıalyq ne fızıkalyq sıpatqa ıe», - dedi A. Steblánko.
Psıhologtyń aıtýynsha, býllıngtiń sebebi kóbinese ishki, otbasylyq máselelermen baılanysty. Al agresıa árdaıym býllıng sebebi bola bermeıdi.
«Eger bala, otbasy ne mektep bolsyn, jaqsy ári qolaıly ortada bolsa, onda bul balanyń býllıngpen aınalysýǵa nemese basqalardy qorlaý arqyly ózin qorǵaýǵa nıeti bolmaıdy», - deıdi ol.