Densaýlyq saqtaý mınıstri Aqmaral Álnazarova Qazaqstan azamattary mindetti áleýmettik medısınalyq saqtandyrý (MÁMS) úshin tólegen qarajat adam qaıtys bolǵan jaǵdaıda nemese elden kóship ketkende qaıda ketetini týraly suraqqa jaýap berdi, - dep habarlaıdy Aqshamnews.kz tilshisi.
Brıfıńte "Bizden mindetti túrde ustalyp jatqan bul jarnalar mura bolyp qalmaıdy, al zeınetaqy jınaǵyn (týystary – red.) mura ete alady. Eger adam shetelge kóship ketse nemese qaıtys bolsa, bul mıllıardtarǵa kim ıe bolady?" degen suraq qoıyldy.
Mınıstr Álnazarovanyń aıtýynsha, zeınetaqy men saqtandyrý jarnasynyń aıyrmashylyǵyn túsindirdi.
"Biryńǵaı jınaqtaýshy zeınetaqy qorynda jınaqtaý júıesi bar, ony keńirek qoldanýǵa bolady. Al saqtandyrý jarnalary saqtandyrý jarnalary retinde qarastyrylady. Kez kelgen saqtandyrý túri sekildi siz jarna tóleısiz, biraq oǵan tek saqtandyrý jaǵdaıy qajet bolǵanda ıelik etesiz. MÁMS kontekstinde bul - syrqattaný, shuǵyl emdeý qajettiligi sekildi jaǵdaılar", – dedi Aqmaral Álnazarova.
Mınıstrdiń aıtýynsha, Medısınalyq saqtandyrý qorynda jınalǵan barlyq qarajat emdeýge, aldyn alý sharalaryna – ıaǵnı, 20 mıllıon qazaqstandyqqa medısınalyq qyzmet kórsetýge baǵyttalady.
"Negizgi prınsıp – deni saý adam aýyryp qalǵan adam úshin, baı adam kedeı adam úshin tóleıdi. Bul – qor qurylǵan sátten bastap kózdelgen ujymdyq jaýapkershilik. Qor bul ustanymdy búginde kezeń-kezeńimen júzege asyryp keledi", – dep túıindedi mınıstr.