Omarov Almaty qalasyna jumys saparymen keldi

Aqparat jáne qoǵamdyq damý mınıstri Asqar Omarov sapar barysynda Almaty qalasyndaǵy Din máselelerin zertteý ortalyǵynyń ujymymen kezdesip, qaladaǵy memlekettik-konfessıaaralyq qarym-qatynas máselelerin talqylady, dep habarlaıdy Almaty-akshamy.kz BAQ.KZ-ke silteme jasap.
Jumys sapary aıasynda mınıstr Á.Qasteev atyndaǵy memlekettik óner mýzeıine baryp, Mıtropolıt okrýgi Túrkistan eparhıasynyń 150 jyldyq mereıtoıy aıasynda uıymdastyrylǵan «Ejelgi orys óneri» kórmesine qatysty. Onda Qazaqstan Respýblıkasynyń Prezıdenti Qasym-Jomart Toqaevtyń quttyqtaý hatyn oqydy.
Memleket basshysy atap ótkendeı, Mıtropolıt okrýgi eparhıanyń isin laıyqty jalǵastyrýshy retinde, aǵartýshylyq jáne qoǵamdyq jumystarmen belsendi aınalysyp, dástúrli rýhanı-adamgershilik qundylyqtardy nasıhattap, etnosaralyq jáne konfesıaaralyq dıalogty damytýǵa úles qosyp júr.
Buǵan qosa kórmede Á.Qasteev atyndaǵy mýzeı qorynan alynǵan XVII-XIX ǵasyrdaǵy shirkeý óneri jınaǵynyń tusaýy kesildi.
Sapar aıasynda A.Omarov Almaty qalasyndaǵy Jastar resýrstyq ortalyǵynda bolyp, mekemeniń tynys-tirshiligin kórip, mınıstrliktiń jastarǵa arnalǵan oqytý baǵdarlamalary jáne jastar salasynda jumys isteıtin qyzmetkerlerdiń mártebesi tóńireginde sóz qozǵady.
Sondaı-aq mınıstr «Eriktiler lıgasy» qozǵalysynyń ókilderimen, «Jaıdarman» qozǵalysynyń qatysýshylary jáne uıymdastyrýshylarymen kezdesti. Áńgime volonterlikti dáripteý, «Jaıdarman» oıyndaryn odan ári damytý, sondaı-aq, jastardy tárbıeleý týraly boldy.
Asqar Omarov jastar resýrstyq ortalyǵy bazasyndaǵy qazaq stand up-ty damytýdy kózdeıtin «J-club» jobasy, CAD modeldeýge oqytý, 3D prototıpteý, grafıkalyq dızaın, montajdaý negizderimen aınalysatyn «Innovation HS» jáne de art-terapıany qoldana otyryp, nashar estıtin balalarmen jumys isteıtin «El-Nazy» mekemelerimen tanysty.