Almatyda 36 myńnan astam adam turǵyn úı kezeginde tur
Bıyl 3 myńnan astam almatylyq qonystoıyn toılaıdy, dep habarlaıdy Almaty-akshamy.kz Almaty.tv-ge silteme jasap.
Olar memlekettik «Nurly jer» baǵdarlamasy aıasynda salynyp jatqan úılerge jaıǵasady. Qalalyq qurylys basqarmasynyń málimetinshe, Almatyda 36 myńnan astam adam turǵyn úı kezeginde tur. Kezegi jetkender men qujaty talapqa sáıkes kelgenderge jyl sońyna deıin osy «Jas qanat» yqshamaýdanynda salynyp jatqan turǵyn úıden páter kilti beriledi. Birinshi bolyp kópbalaly otbasy, jalǵyz basty analar, múmkindigi shekteýli bala asyrap otyrǵandar nazarǵa alynady. Keıinnen memlekettik qyzmettegi jas otbasyna qoldaý kórsetiledi.
«41 úı. 3116 páter. 163 myń sharshy metr bıyl paıdalanýǵa beriledi. 185 páter – kópbalaly analarǵa arnalǵan. 216 páter – osal toptarǵa arnalǵan. 2705 páter – kredıttik páterler bolyp sanalady», – dedi qurylys basqarmasynyń bólim basshysy Aıdar Nurǵojaev.
Jańa keshen aýmaǵy 36-85 sharshy metr ekonom sanatyndaǵy 124 páterden turady. Turǵyn úı kesheniniń mańynda avtoturaq pen balalar alańy da qarastyrylǵan. Sondaı-aq munda 1500 balaǵa arnalǵan mektep pen emhana qurylysy júrip jatyr. Áleýmettik nysan jyl sońyna deıin qoldanysqa beriledi.
Jalpy qazir qalada jeńildetilgen nesıemen «Shańyraq», «Baqytty otbasy» jáne «Almaty jastary» baǵdarlamalary arqyly úı alýǵa bolady. Jyldyq mólsherlemesi 2-5 paıyz aralyǵyndaǵa joba maqsaty – áleýmettik sanattaǵy januıalar men jas otbasylardy turǵyn úımen qamtý.
«Kópbalaly analar bar, múgedek bala asyraýshy otbasylar bar, jetim balalar páter kezeginde turady, biraq olar páter jaldap tursa, sol aqshanyń 50 paıyzyn úkimet tólep beredi», – dedi Komýnaldyq ınfraqurylymdy damytý basqarmasynyń bólim basshysy Ǵalymjan Ábdishúkiruly.
Sondaı-aq qalada qabyrǵasy qamystan turǵyzylǵan eski úılerdi súrý josparly túrde júzege asyp keledi. Olardyń basym bóligi Túrksib aýdanynda ornalasqan. Aımaqta 1229 turǵyn úı bolsa, onyń 600-ge jýyǵy eskirgen.