Oljas Bektenov CITIC Group basshysy Sı Gohýamen birlesken ınfraqurylym jobalaryn iske asyrý qarqynyn talqylady, dep habarlaıdy almaty-akshamy.kz.
Qazaqstan Premer-Mınıstri Oljas Bektenov CITIC Group Dırektorlar keńesiniń tóraǵasy Sı Gohýamen kezdesýde qazaq-qytaı birlesken jobalaryn iske asyrý jáne energetıka men ónerkásip salalaryndaǵy yntymaqtastyqty nyǵaıtý máselelerin talqylady.
Qazirgi sátte qytaılyq kompanıanyń qatysýymen respýblıkalyq mańyzy bar avtojoldardy rekonstrýksıalaý boıynsha iri ınfraqurylym jobalary iske asyrylýda. Atap aıtqanda, jalpy uzyndyǵy 1 131 km bolatyn «Taldyqorǵan – Óskemen» jáne «Qaraǵandy – Balqash» trassalarynyń 24 ýchaskesinde qurylys-montaj jumystary júrgizilýde.
Búgingi tańda «Taldyqorǵan – Óskemen» avtojolynda 768 km-diń 748 shaqyrymynda tómengi jabyn qabaty boıynsha qozǵalys ashyldy, jol jabynynyń joǵarǵy qabaty boıynsha qalǵan jumys 48%-dy quraıdy; «Qaraǵandy – Balqash» trassasy boıynsha barlyq 363 km boıy jabynnyń tómengi qabaty boıynsha qozǵalys ashyq, jol jabynynyń joǵarǵy qabaty boıynsha qalǵan jumys 49%-dy quraıdy.
Sonymen qatar jol ınfraqurylymyn odan ári jańǵyrtý jónindegi ambısıalyq maqsattardy eskere otyryp, taraptar «CASPI BITUM» BK» JSHS zaýytynyń qýatyn jylyna 750 myń tonnaǵa deıin ulǵaıtý jobasyn iske asyrý barysyn qarady. Atalǵan jobany iske asyrý qurylys maýsymy qyzatyn kezeńde bıtýmǵa degen qajettilikti jabady.
Máseleni talqylaý barysynda kezdesýge qatysýshylar aýyl sharýashylyǵy, taza energetıka, qorshaǵan ortany qorǵaý jáne sıfrlyq tehnologıalar salasyndaǵy yntymaqtastyqty damytýǵa daıyn ekendikterin atap ótti.
Aıta ketý kerek, «CITIC Group» korporasıasy 1979 jyly qurylǵan. CITIC Group Qazaqstanda energetıka, hımıa ónerkásibi, qarjy, ınfraqurylym jáne basqa da salalardaǵy jobalardy iske asyrady.