Premer-Mınıstr Oljas Bektenovtiń tóraǵalyǵymen ótken Úkimet otyrysynda tótenshe jaǵdaılar vıse-mınıstri Baýyrjan Syzdyqovtyń, batys óńirlerdiń, sondaı-aq Soltústik Qazaqstan oblysynyń ákimderiniń sý tasqynyna qarsy is-sharalar týraly baıandamalary tyńdaldy.
Úkimet basshysy atap ótkendeı, elimizde sý tasqyny jaǵdaıy birtindep turaqtalyp keledi. Aqmola, Aqtóbe, Qaraǵandy, Qostanaı jáne Pavlodar oblystarynda qaýiptiń beti qaıtty. Óte kúrdeli ahýal qalyptasqan Petropavl jáne Qulsary qalalarynda sý tartyla bastady, dep habarlaıdy Almaty-akshamy.kz Primeminister.kz-ke silteme jasap.
Jumys ýaqytynda TJ aımaqtarynan barlyǵy 119 myńnan astam adam qaýipsiz aımaqqa kóshirildi. Búginde Úkimette, Tótenshe jaǵdaılar mınıstrliginde, óńirlerde jedel shtabtar táýlik boıy jumys isteýde. Problemalardyń barlyǵy jergilikti jerlerde jedel qaralyp, shuǵyl sheshimder qabyldanýda.
Úkimet basshysy Mınıstrler Kabınetiniń nazaryn sý tasqyny kezinde zardap shekkenderge keltirilgen shyǵyndardy óteý jumystaryna aýdardy. Qazirgi ýaqytta 11 myńǵa jýyq otbasy 100 AEK mólsherinde tólem aldy.
«Zardap shekkenderge keltirilgen shyǵyndardy óteý tártibine túzetýler bekitildi. Keshe men tıisti qaýlyǵa qoı qoıdym. 100 aılyq eseptik kórsetkishke qosymsha taǵy 150 AEK-ke deıin ótemaqy tóleıtin bolamyz. Oǵan adamdar tońazytqysh, ústel, oryndyqtar, ydys-aıaq, kıim-keshek sıaqty joǵalǵan birinshi kezektegi qajetti zattardy satyp ala alady. Azamattarǵa aıtatynym, sabyrlyq saqtanyńyzdar. Eshkim de kómeksiz qalmaıdy Bul máselelerdiń barlyǵy Prezıdenttiń jáne meniń jeke baqylaýymda. Sondyqtan biz osy synaqtan abroımen ótemiz dep bilemin», — dep atap ótti Oljas Bektenov.
Sondaı-aq kásipkerlerdiń shyǵyndary óteledi.
Sonymen qatar Premer-Mınıstr keıbir óńirlerde sý basý qaýpi áli de seıilmegenin atap ótti. Ózenderde sý deńgeıiniń kóterilý faktileri tirkelýde.
Osyǵan baılanysty Tótenshe jaǵdaılar mınıstrligine ákimdiktermen birge sý tasqynyna baılanysty jaǵdaıǵa baqylaýdy kúsheıtýdi jalǵastyrý jáne jáne qajet bolǵan jaǵdaıda shuǵyl áreket etip, halyqty kóshirýdi qamtamasyz etý tapsyryldy. Ekologıa mınıstrligi sý obektileri men ózenderde gıdrobeketter sanyn ulǵaıtýy qajet.
«Óńir ákimdikteri sý basqan úılerdi, ǵımarattar men nysandardy tez arada tehnıkalyq tekserýdi aıaqtasyn. Sý ketken jerlerde kópke sozbaı, tasqynnan keıingi tazartý, dezınfeksıalaý jáne qalpyna keltirý jumystaryn bastaý qajet», — dep atap ótti Premer-Mınıstr.
Ónerkásip jáne qurylys mınıstrligine turǵyn úılerdi, áleýmettik jáne ınjenerlik ınfraqurylymdy qalpyna keltirý boıynsha jergilikti jerlerdegi barlyq jumystardy úılestirý úshin jedel top qurý tapsyryldy.
«Qurylys jáne jóndeý jumystarynyń naqty jospary qajet. Bul jaǵdaı bizge ınfraqurylymdy jańartýǵa, eldi-mekenderdi kóriktendirýge jańasha kózqarasty qalyptastyrady. Onyń ústine Memleket basshysynyń tapsyrmasy boıynsha “Taza Qazaqstan” aýqymdy aksıasy bastaldy. Barshańyzǵa Prezıdenttiń sózin esterińizge salǵym keledi, bul bir rettik aksıa nemese naýqan emes, turaqty jumysqa aınalýy kerek. Bul eldi-mekenderdi kóriktendirýge qatysty jańasha kózqaras qalyptastyrady», — dep atap ótti Oljas Bektenov.