Qazaqstan Respýblıkasy İİM Ulttyq ulanynyń Taraz qalasynda ornalasqan «Ońtústik» óńirlik qolbasshylyǵyna qarasty 5513 áskerı bóliminde erekshe shara ótti.
Parıj Olımpıadasynyń chempıony, elimizdiń maqtanyshy Eldos Smetov quqyqtyq tártip áskeriniń sarbazdarymen júzdesti, dep habarlaıdy aqshamnews.kz.
Bul kezdesýge Eldos Smetovpen birge onyń bapkeri Ǵalymjan Jylgeldıev jáne Jambyl oblysy «Dınamo» sport qoǵamy qoǵamdyq birlestiginiń orynbasary Jomart Ysqaq ta qatysty. Erkin formattaǵy jıynda dańqty dzúdoshymyz óziniń sport salasyndaǵy tájirıbesimen bólisti. Kezdesý áserli ári tárbıelik máni zor boldy. QR İİM Ulttyq ulanynyń sport komandasyn daıarlaý ortalyǵynyń áskerı qyzmetshisi Eldos Smetov ulandyqtarǵa óziniń sporttyq mansabynyń bastaýynan búgingi jeńisterine deıingi qyzyqty jolyn baıandap berdi. Ol jeńiske jetýdiń negizgi qaǵıdattary – tártip, eńbekqorlyq jáne tabandylyq ekenin erekshe atap ótti.
– Aldaryńyzǵa qoıǵan úlken maqsattar bar, sol maqsattarǵa qol jetkizý úshin ómirdegi barlyq qıynshylyq pen aýyrtpalyqtardyń bárinen ótý kerek. Jetistikke kez kelgen adam ońaı jolmen jetken emes. Ony men óz tájirıbemnen aıtyp otyrmyn. Barlyǵy da tókken ter men etken eńbektin nátıjesi, – deıdi Eldos Smetov.
Shara barysynda Olımpıada chempıony dzúdo sportyndaǵy erekshe ádis-tásilderin kórsetti. Jas ulandar chempıonnyń árbir qımylyn muqıat baqylap, sportqa degen qyzyǵýshylyqtaryn odan ári arttyrdy. Sonymen qatar sarbazdar chempıonǵa ózderin tolǵandyrǵan suraqtaryn qoıyp, onyń keńesterin tyńdady. Kezdesýde bapker Ǵalymjan Jylgeldıev te sóz sóılep, Eldostyń jeńiske jetý jolyndaǵy eren eńbegi men yntasyn erekshe atap ótti.
– Bizdiń qazaq jerimizde dzúdo kúresinde alǵashqy olımpıadanyń altyny, onyń ózin jerlesimiz Jambyl jeriniń sportshysy alyp kelip otyr. Bul degen úlken mártebe, maqtanysh! Jeńistiń jalaýy Tarazymyzǵa beker kelmedi. Sebebi kıeli jerden kezinde Jaqsylyq Úshkempirov aǵamyz da Olımpıada chempıony atanǵan bolatyn, – dedi bapker.
Al Jomart Ysqaq sport pen tártiptiń jas urpaq tárbıesindegi mańyzy týraly aıtyp, jas ulandardy patrıottyq rýhta tárbıeleýge baǵyttalǵan mundaı is-sharalardyń róli zor ekenin jetkizdi. Kezdesý sońynda qonaqtarǵa arnaıy alǵys hat tabystalyp, syı qurmet kórsetildi. Sarbazdar chempıonmen estelik sýretke túsip, onyń qoltańbasyn aldy. Bul kezdesý olardyń júreginde uzaq ýaqyt saqtalatyny sózsiz. Eldos Smetovtiń ómir joly men jetistikteri jas sarbazdarǵa úlken shabyt berip, olardy bolashaqta elimizdiń namysyn qorǵaýǵa jańa serpin syılaǵany anyq.