Bıyldan bastap ár ata-ana úıden shyqpaı-aq balalaryn balabaqsha kezegine qoıa alady.
Ol úshin mobıldi qosymsha arqyly ózine unaǵan bóbekjaıdy tańdap, kezek sanyn kórip, tipti bos orynnyń bar-joǵyn da bilip otyrady, dep habarlaıdy aqshamnews.kz.
Bul vaýcherlik qarjylandyrý jobasy dep atalady. Byltyr shildede pılottyq negizde Tarazda tomaǵasy sypyrylyp, artynsha Shymkent pen Túrkistanda, jyl aıaǵynda Oralda júzege asty. Artyqshylyǵy ata-ana Indigo aqparattyq júıesi arqyly 4 balabaqshanyń bireýin tańdap, kezekti kóredi, bos oryndy biledi.
Sondaı-aq, ata-ana memleketten balalary úshin bólinetin qarjy kólemin de qaraı alady. Elimizde bir bala úshin jan basyna shaqqandaǵy qarjylandyrý kólemi 58 myń teńge. Bul tólem balańyz baratyn bóbekjaı shyǵynyna jumsalady. Qarajat áýeli ár balanyń atyna ashylǵan esep-shotqa túsedi. Búldirshinniń balabaqshaǵa barǵany rastalǵannan keıin ǵana mekemege aýdarylady. Demek kelmegen balany keldi dep jalǵan esep jasaı almaıdy.
Janar Ospanova, №9 bóbekjaı meńgerýshisi:
Bir kún kelmeı qalsa bir kúndik qarajatymyz alynyp ketedi. Sebepsiz kelmeı qalǵan jaǵdaıda. Sondyqtan ár tárbıeshi sanaly túrde jumys jaqsartyp jatyr. Sol bala kúndelikti balabaqsha kelsin degen maqsatta.
Elimizde 1 mln-nan astam bala balabaqshaǵa barady. Al byltyrdan bastap kezekke turý kúrt azaıǵan. Bul sandyq júıege daıyndyq nátıjesi, deıdi mınıstrlik tarapy.
Manara Adamova, QR oqý-aǵartý mınıstrliginiń mektepke deıingi bilim berý departamentiniń dırektory:
2016 jyly 560 myń bala kezekke tursa, kezektegi 2-6 jastaǵy bala sany 107 myń boldy. Al qazir vaýcher jobasymen qatar júrip, ary qaraı qarjylandyryp jatqannan keıin qazir 2-6 jastaǵy kezekte turǵan balalardyń sany 84 myń ǵana qaldy.
Al jeńildikteri bar ata-analar qujatyn tirkeý arqyly kezekten tys vaýcher ala alady.
Aıta keteıik, balabaqshalar vaýcherlik mehanızmge kóshkennen keıin eshqandaı konkýrsqa qatyspaıdy. Qarjy aýdarýdy mınıstrliktiń biryńǵaı operatory ǵana júzege asyrady.