1 shilde - Ulttyq dombyra kúni. Ataýly kún 2018 jyldan beri keńinen tanylyp keledi.
Bul kún qazaqtyń mádenı kody sanalǵan qos ishekti, shertip oınaıtyn aspapqa degen qurmettiń belgisi. Dombyra - jaı ǵana mýzyka quraly ǵana emes, ol - ulttyń rýhy, tarıhy men taǵdyryn sóıletken kıeli mura. Osy kúni zamanaýı mýzykany ulttyq aspappen sheber ushtastyryp júrgen, dombyra arqyly jas urpaqqa shabyt berip kele jatqan jandar kóp. Tipti "naǵyz qazaq - qazaq emes, naǵyz qazaq - dombyra" degen sózge laıyq ekenine dálel bolar jandar jetkilikti.
Búgin osy ónerdi dáriptep júrgen erekshe tulǵa, estrada ártisi, kóp aspapty meńgergen mýzykant Oleg Nıkıtınniń shyǵarmashylyǵyna úńilip kórdik.
Dombyra - meniń alǵashqy "mahabbatym"
Oleg Nıkıtın kúnine kem degende 1,5-2 saǵatyn dombyra tartýǵa arnaıdy eken. Sebebi bul aspap onyń júreginiń tórinen oryn alǵan. Ónerdegi senimdi serigi - dombyra ómiriniń 80 %-da janynan tabylǵan, sondyqtan ony erekshe qurmetteıdi. Oleg Nıkıtın — zamanaýı dombyrashy, álemdik hıtterdi qazaqtyń bas aspaby - dombyramen oryndap júrgen erekshe óner ıesi
Oleg dombyrany tek kúı tartatyn aspap emes, mýzykanyń kez kelgen túrine beıimdeýge bolatynyn dáleldep júrgen talantty mýzykant, ári estrada ártisi.
Dombyramen ajyramas 30 jyl
Jasy 37-ge kelgen Oleg Nıkıtın dombyrany 7 jasynan beri kásibı túrde meńgerip keledi. Sodan beri bul aspap onyń ómiriniń ajyramas bóligine aınaldy. Qos ishekti aspaptyń múmkindigin barynsha ashyp, ony Bethovennen bastap qazirgi zamanǵy hıp-hopqa deıin jetkizgen.
— Dombyramen alǵash Aqtaýda tanystym. Ol jaqta dombyra ár úıde bar dese bolady. Biraq meniń shyn qyzyǵýshylyǵym Aqtóbege kóshken soń oıandy. Birde qalaǵa kelgen Qurmanǵazy atyndaǵy orkestrdiń konsertine baryp, áserlenip shyqqan soń, ata-anamnan mýzykalyq mektepke berýlerin ótindim, — deıdi mýzykant.
Dombyradan bólek, Oleg gıtara, fortepıano, baıan, saksofon, sondaı-aq sybyzǵy, sazsyrnaı, shańqobyz sıaqty halyq aspaptarynda da jaqsy oınaıdy. Mýzykaǵa jan-tánimen berilgen ol — kásibı deńgeıde oınaıtyn ámbebap mýzykant.
SuperStar.kz - sahnaǵa jol salǵan joba
Olegtiń úlken sahnaǵa shyǵýyna túrtki bolǵan — SuperStar.kz jobasy. 2007 jyly ótken baıqaýǵa elimizdiń túkpir-túkpirinen 14 myńnan astam adam qatysqan. Kóptiń arasynan ónerimen kózge túsken Oleg úzdik ondyqqa engen.
— Ol kezde men nebári 17 jasta edim. Fınalǵa jetkenim ózime de, ónerime de úlken serpin berdi, — deıdi ol.
SuperStar.kz jobasynan keıin ol respýblıkanyń barlyq aımaǵyn aralap, 6 myńnan astam mektep pen 1,5 myńdaı balalar úıinde konsert bergen. Birneshe halyqaralyq baıqaýlardyń jeńimpazy. Mýzykamen qatar jeke ómirde de erte eseıgen: 18 jasynda úılenip, 20 jasynda áke atanǵan. Qazir úsh qyzdyń ákesi.
Dombyramen Bethovendi oryndaýǵa bolady
Qazir Oleg — Almaty qalalyq polısıa departamentiniń memlekettik orkestrinde solıs. Sonymen qatar «Rolex BAND» tobynyń múshesi. Bul topta dombyra, gıtara, klavıshtik aspaptar qatar oryndalady. Repertýarlary keń aýqymdy: keńes dáýiriniń ánderinen bastap, qazirgi zamanǵy estradaǵa deıin bar.
Oleg Nıkıtınniń basty maqsaty — dombyranyń múmkindigin keńinen tanytý. Sol sebepti de ol álemdik jáne zamanaýı hıtterge dombyramen kaverler jasap júr.
— Adamdar tanys áýenderdi dombyramen tyńdaǵanda tańǵalady. Ásirese balalar. TikTok pen YouTube-ta mıllıondaǵan qaralym jınap jatqan kaverlerden keıin ata-analar balalaryn dombyra úıirmelerine jazyp jatyr. Bul men úshin úlken maqtanysh, — deıdi Oleg.
«Jasaı ber, qazaq!» jáne Otan ana
Mýzykanttyń repertýarynda halyq kúılerimen qatar, Eskendir Hasanǵalıevtiń «Jasaı ber, qazaq!», Batyrhan Shúkenovtiń «Otan ana» sekildi shyǵarmalary da bar.
— Kez kelgen úlken sharany kúımen ashyp, «Jasaı ber, qazaq!» ánimen jabamyn. Bul — meniń ónerimdegi basty sımvoldarym, — deıdi ol.
Arman – dombyrany álemge tanytý
Qazir Oleg Nıkıtın — estrada ártisi ǵana emes, Qazaqstanda dombyrany jańa deńgeıde nasıhattap júrgen belgili azamattardyń biri. Onyń Ulttyq dombyra kúnine oraı túsirgen beınebaıany da bar. Qazaq jáne orys tilinde birneshe ánderi de bar. Qazaqtyń kúılerin de kúmbirlete asqan sheberlikpen oryndap júr.
— Mende bári asyqpaı, retimen júredi. Basqalar bir jylda jasap úlgeretin dúnıeler úshin men on jyl jumsaýym múmkin. Biraq shyn nıetpen jasalǵan óner eshqashan umyt qalmaıdy, — deıdi Oleg.
«Kásibı dombyrashy retinde men úshin Ulttyq dombyra kúniniń mańyzy zor. Bul kúndi ózimniń merekem retinde sezinemin jáne erekshe qýanyshqa bólenemin. Osy kúni el boıynsha myńdaǵan dombyrashy bas qosyp, aýqymdy konsertterge qatysady. Dombyraǵa erekshe qurmet kórsetiledi. Ulttyq rýh oıanyp, erekshe kúıge bólenemin», - dep qorytty ol búgingi ulttyq merekeniń mán-mańyzy jaıly oıyn.
Oleg Nıkıtınniń óner joly — dombyranyń sheksiz múmkindigin dáleldeıtin jarqyn mysal. Ulttyq aspapty jańa qyrynan tanyp, búgingi urpaqpen úndestirgisi keletin ár mýzykant úshin shabyt kózi. Oleg syndy mýzykanttardyń eńbegi - ulttyń mádenı murasyn saqtap qana qoımaı, ony jańa býynmen baılanystyrý jolynda mańyzdy qadam. Dombyra - halyqtyń shejiresi ispetti, sebebi onda búgingi kúnniń de, bolashaqtyń da úni bar.