Áke jaıly jyly estelik...
Otan qorǵaýshylar kúni bizdiń otbasymyz úshin árqashan orny erekshe mereke bolatyn, áli de solaı. Bul kúni biz búkil otbasymyzben jınalyp, úlken aq dastarhan basynda bas qosamyz. Dál osy merekeni atap ótý dástúrin bizge ákemiz úıretip, sińdirdi. Tipti óziniń týǵan kúni ol úshin qatardaǵy qarapaıym kúnderdiń biri bolatyn jáne oǵan dál búgingi kún sıaqty asa mán bere qoımaıtyn. Ákem óte patrıot adam edi jáne bárimizdi sondaı bolýǵa úıretti. Ókinishke qaraı, qazir ózi ortamyzda joq, biraq ózi úıretip ketken dástúr qaldy.
Úsh balasynyń ishinde eki uly áke jolyn qýyp, ózi sıaqty ofıser bolady degen úmiti de joq emes edi. Alaıda, halyq arasynda qyzdar ákesine kóbirek uqsaıdy dep beker aıtpaıtyn bolar. Qyz balasy ákege jaqynyraq bolady. Ákeleri de qyzdaryna kelgende meıirimdirek. Ári qyzdar ákeni qorǵany ekenin sezinip, onyń panasynda ózderin erkin sezinedi. Men de ákemdi ózime pir sanap, soǵan qaraı boı túzeýge tyrystym. Otbasyndaǵy jalǵyz qyz bolǵannan keıin, meni barynsha erke qylyp ósirdi, betimnen qaqpaǵasyn, batyldaý bolyp óstim. Ákemniń jumystan sharshap kelgenine qaramaı, aldyna otyryp alyp, balalyqpen onyń kúnimen ne istegenin, qaıda bolǵanyn surap qoımaıtynmyn.
Ákem kúlimsiregen kúıi kúni boıy qylmyskerlerdi qolǵa túsirgenin, qarapaıym beıbit jandardyń tynysh uıqysy úshin qaýipti qylmyskerlerdi qýǵanyn aıtatyn. Sol áńgimelerdi aıtyp otyrǵanda ol qyzynyń óz oıynda ákesiniń batyrlyǵynyń beınesin salyp, onyń ár sózinen júrgeninen ótkizip jatqanynan múlde beıhabar bolǵan shyǵar.
Ákemniń erligine súısingen men sol kezde-aq ákem sıaqty bolamyn dep sheshken bolatynmyn. Týra ákem sıaqty erjúrek ári batyl ofıser bolamyn dep. Bul sheshimim jaıly men oǵan 10 jasymda aıttym. Ol kezde ákem meni qoldady. 10-11-synyptarda men mılısıa mektebin bitirdim. Ákemdi meniń ózime degen senimdiligim men sheshim qabyldaǵysh qasıetim qyzyq bolǵan sıaqty. Ol men mektep aıaqtaǵansha oıy ózgerip, ózine saı «qyzdarǵa saı» mamandyq tańdaıdy dep sendi. Meniń óz sheshimnen qaıtpaıtynymdy bile tura, otbasymyzdyń bári, aldymen ákem meniń mamandyǵyma qarsy boldy. Ákem meniń ınjener ekolog oqýyna túskenimdi qalady. Ýnıversıtetti ekolog mamandyǵyna támámdaǵannan keıin, men sol dıplomdy ákelip, ákemniń qolyna ustattym. Al ózim bolsam ákemnen jasyryp, ekinshi joǵary bilim – zańgerlikke tústim.
Zań fakúltetinde oqyp júrip, men Atyraý oblysynyń QAJD-ne jumysua ornalastym. Úıge áskerı kıim kıip, jyltyraǵan bers etik kıip kelgen kezde ákemniń tań qala qaraǵan túri áli kóz aldymda. Bári meniń bala kezimde ákem aıtyp bergen, sıpattaǵan beıne bolatyn. Sonda ákem úndemeı meni qushaqtady da, batasyn berdi.
Ofıserlik qyzmetti abyroımen atqaryp júrgenime 10 jyl boldy. Ár tańda jumysqa bararda bir jarym jastaǵy qyzym meni baqylap otyrady. Ol da bir kezdegi men sıaqty pogonymdaǵy juldyzdarǵa qyzyǵady. Meniń kamýflájym men fýrajkamdy kıgisi keledi.
Kóptegen jyldar ótken soń, meniń eń izgi armanym - Tólegenovtar áýletiniń áskerı istegi qyzmetin jalǵastyrý jáne ony abyroı men qadir-qasıetin joǵaltpaı joǵary kóterip alyp júrý. Men óz jumysymdy jaqsy kóremin jáne qyzmet er adamdyki nemese áıeldiki dep bólinbeıdi dep sanaımyn. Eń bastysy - Otan aldyndaǵy boryshyn oryndaýǵa degen qulshynys pen umtylys.
Ákem 2014 jyly 59 jasynda ómirdin ótti. Men ákemniń meni túski úzilis kezinde atraksıondar saıabaǵyna aparǵanyn jıi eske alamyn. Óıtkeni keshke ol árqashan jumystan bosamaıtyn. Al karýselder óz jumysyn tek keshki ýaqytta bastaıtyn, al ákem ıesinen olardy bir men úshin iske qosýdy surap bergen bolatyn. Men sol kúni karýselde kóp aınaldym jáne qýanyshtan bal-bul janǵan júzimdi tómende ákem meıirimmen qarap turdy. Meniń basymdaǵy bantymdy betime esken jel jelpidi. Qazir janym erekshe qulazyp, muńaıǵanda, dál sol sátti, ákemniń baqytty júzin esime alamyn. Quddy ákem qazir de meni baqylap turǵandaı. Bul maǵan árqashan jańa kúsh beredi, men oıymda onymen tildesip: «Bári jaqsy, áke! Óıtkeni men seniń qyzyńmyn ǵoı. Ofıserdiń qyzy!» deımin.
Barsha qazaqstandyqtardy merekemen quttyqtaımyn! Elimizge beıbitshilik pen órkendeý tileımin. Bizdiń balalarymyzdyń kúlkisi alańsyz bolsyn!