Almaty oblysynyń polısıa departamentinde Otan qorǵaýshylar kúni men Jeńis kúni qarsańynda óńirdegi polısıa qyzmetkerlerin erligi, minsiz qyzmeti men adaldyǵy úshin marapattaý rásimi ótti
İshki ister organdarynyń dańqty dástúri keń-baıtaq jerimizdi janqıarlyqpen qorǵap qalǵan batyr babalarymyz ben Uly Otan soǵysy ardagerleriniń óshpes erliginen bastaý alady, dep habarlaıdy Almaty-akshamy.kz Polisia.kz-ke silteme jasap.
«Bul kún qazaqstandyqtardyń Uly Otan soǵysyndaǵy erlikteriniń shejiresin de, Otanǵa qyzmet etý dástúrleriniń sabaqtastyǵyn da bildiredi. Babalarymyzdyń erligi dańqty Jeńistiń uly murasy retinde urpaqtan-urpaqqa jalǵasady», – dedi departament bastyǵy Baýyrjan Álenov.
Sondaı-aq is-sharada ishki ister organdaryna qyzmetke jańadan kelgen 20 taǵylymdamadan ótýshi óziniń qyzmettik boryshyna, Qazaqstan Respýblıkasy men onyń halqyna adal bolýǵa ant berdi. Ant qabyldaǵannan keıin barlyq jas qyzmetkerlerdi tálimgerler keńesiniń tóraǵasy Saǵatbek Nurahmetov alǵashqy ofıserlik shenderin alýlarymen quttyqtady.
«Ant ómirdi burynǵy jáne keıingi dep ekige bóledi. Osy sátten bastap árqaısyńyz búgingi aıtylǵan sózder ómirlik ustanymǵa aınalýy úshin ómir súrýge mindettisizder. Sizder óz áriptesterińizdiń, Uly Otan soǵysy ardagerleriniń, Otan azattyǵy úshin janyn qıǵan jaýyngerler men qolbasshylar aldynda elge, halyqqa adal qyzmet etýge, Qazaqstan zańdary men halqyn qorǵaýǵa ant berdińizder. Árqaısylaryńyz ata-babalaryńyzdy eske alýǵa laıyq bolatyndaryńyzǵa senimdimin», – dedi S. Nurahmetov jas qyzmetkerlerge.
İshki ister organdarynda ant qabyldaý jaı ǵana dástúr emes, ol qoǵam men memleketke qyzmet etý ıdeologıasynyń negizi bolyp tabylady. – Jas mamandar el taǵdyryn óz taǵdyrynan bıik qoıǵan polısıa qyzmetkerleriniń ustanymdaryn erlikpen jalǵastyryp, synaqtardan abyroımen ótip, ózderiniń qyzmettik mindetterin adal atqaratynyna senimdimin, – dep atap ótti B. Álenov. Saptyq alanda saltanatty sherýmen ótken Almaty oblysynyń polıseıleri qoǵamdyq tártip pen azamattardyń qaýipsizdigin saqtaý boıynsha ózderine júktelgen mindetterdi oryndaýǵa daıyn ekendikterin kórsetti.