Atyraýdaǵy Quryltaıda qoǵamdyq toptasý men jalpyulttyq qundylyqtardy damytý taqyryptary arqaý boldy. Bul rette, Memleket basshysy Qasym-Jomart Toqaev «halyqtyń bereke-birligin saqtaý eldigimiz úshin asa mańyzdy» ekenin aıtyp, oǵan qajetti alǵysharttar men naqty isterge toqtaldy.
Ultymyz úshin mańyzdy onomastıka, tól tarıh, rýhanıat, qazaq tili, kreatıvti ındýstrıa, ulttyq biregeıligimizdi nyǵaıtý, kitap oqıtyn ultqa aınalý máseleleri de Prezıdent nazarynan tys qalmady. «Ozyq oıly elge aınalýdyń tóte joly – kitap oqý» ekenin ekpin túsire eske saldy.
Bizdiń baı tarıhı-mádenı muramyzdy saqtaý, tarıhı jádigerlerimizdi shetel murajaılarynan Qazaqstanǵa qaıtarý jumystaryn jandandyrý, arheologıa salasyna qatysty zańdardy jetildirý týraly keleli oılar ortaǵa salyndy. Ásirese, Prezıdent «ulttyń jańa sapasyn qalyptastyrý, jaǵymsyz ádetterden arylý, esirtki zattaryn óndiretin adamdardyń jazasyn barynsha qatańdatyp, ony eń aýyr qylmystarǵa teńestirý» qajettigin tilge tıek etip, Parlamentti bul bastamany qoldaýǵa shaqyrdy.
Memleket basshysy «Biz nashaqorlyqqa jáne esirtki bıznesine qarsy kúresý úshin keshendi jospar qabyldadyq. Úkimet lýdomanıamen kúreske qatysty dál sondaı jospar qabyldaýy kerek”,- dedi. Qumarpazdyqqa zań júzinde shekteý qoıý qajettigin aıtty. Parlamentte qaralyp jatqan sol jobany osy sesıanyń sońyna deıin qabyldaý qajet» ekenin de aıryqsha atap ótti.
Osy oraıda, «Zań men tártip saqtalýǵa tıis, ıaǵnı qoǵamda zań ústemdigi bolýy qajet» degen Prezıdent ustanymy – basty baǵdar bolmaq. Bul Memleket basshysy usynǵan «Ádiletti Qazaqstan – Adal azamat – Ozyq oıly ult» úshtaǵan uǵymyn barynsha tıanaqtaı túsedi.