Zańdarǵa engiziletin túzetýler aıasynda veıp jáne nasybaı taratqany úshin qylmystyq jaýapkershilikke tartý kózdelgen. Osy qadam nasybaıǵa tolyq tyıym salýǵa múmkindik beredi. Bul týraly Ulttyq quryltaı otyrysynda Prezıdent Qasym-Jomart Toqaev aıtty, dep habarlaıdy almaty-akshamy.kz.
«Densaýlyqqa zıan ári uıat ádettiń biri – nasybaı atý. Onyń qalaı jasalatyny belgili. Eshqandaı sanıtarlyq talap saqtalmaıdy. Quramynda túrli dertti, onyń ishinde onkologıalyq aýrýlardy qozdyratyn zattar bar. Nasybaıdy óndirýge jáne taratýǵa 2015 jyly tyıym salynǵan. Biraq áli kúnge deıin kóshede, tipti azyq-túlik dúkenderinde ashyq satylyp jatyr», - dedi Qasym-Jomart Toqaev.
Memleket basshysy atalǵan problemaǵa qatysty quqyq qorǵaý mekemeleri eshqandaı shara qoldanyp jatpaǵanyn synǵa aldy.
«Qazir – 21 ǵasyr, joǵary tehnologıa men jasandy ıntellekti qarqyndy damyǵan zaman. Al bizdiń azamattarymyz aýzyna nasybaı salyp, qaqyryp-túkirip júredi. Bul ne degen masqara?! Osy jaǵymsyz qylyqty ata dástúri sanaıdy. Shyn máninde, bul baryp turǵan mádenıetsizdik. Ony toqtatý qajet. Jalpy, nasybaı óndirip, taratqany úshin zań júzinde belgilengen jaýapkershilik tym tómen. Qazir osyǵan qatysty zańdarǵa túzetý engizý máselesi qarastyrylyp jatyr. Onda veıp qana emes, nasybaı taratqany úshin de qylmystyq jaýapkershilikke tartý kózdelgen. Bul qadam nasybaıǵa tolyq tyıym salýǵa múmkindik beredi. Sondaı-aq, aqparat quraldary arqyly jan-jaqty túsindirý jumysy júrgizilýi tıis. Bul - ult saýlyǵyna da, elimizdiń abyroı-bedeline de keri áserin tıgizetin ádet. Órkenıetti el bolamyz desek, odan tolyq arylýymyz kerek», - dedi Prezıdent.