- Memleket basshysy Qasym-Jomart Toqaevtyń úndeýi jarıalandy.
Prezıdent oryn alǵan jaǵdaıǵa baılanysty birde-bir adamdy memleket eskerýsiz qaldyrmaıtynyn jetkizdi.
“Búgin men elimizdiń azamattaryna arnaıy úndeýimdi joldap otyrmyn. Barshańyzǵa belgili, qazir elimizde kúrdeli jaǵdaı qalyptasyp otyr. Qardyń kúrt erýine baılanysty aımaqtarda sý tasqyny bolyp jatyr. Bul – tabıǵı apat. Mundaı ahýal uzaq jyldan beri bolmaǵan. Bul kólemi jaǵynan sońǵy 80 jyldan bergi eń iri tabıǵı apat deýge bolady”,- dedi Prezıdent.
Rasynda mundaı kólemdegi tasqyn sý basý jaǵdaıy talaı jyldan keıin bolyp jatyr.
Sý tasqynyna baılanysty elimizdiń on aımaǵy - Abaı, Aqmola, Aqtóbe, Atyraý, Batys Qazaqstan, Qaraǵandy, Qostanaı, Pavlodar, Soltústik Qazaqstan jáne Ulytaý oblystarynda tótenshe jaǵdaı qalyptasty.
Memleket basshysy Qytaıdan kele salyp, atqarýshy organdar jibergen olqylyqtardy túzeý úshin shuǵyl jıyn ótkizdi. Respýblıkalyq shtab qurdy. Úkimetke naqty tapsyrmalar berdi. Qanat Bozymbaevty Úkimet basshysynyń orynbasary etip taǵaıyndady. Sonyń arqasynda úılestirý jumystary jedel júrgizildi. Prezıdent der kezinde kirispegende barlyq qajetti sharalar qabyldanbaı qalar edi.
“Barlyq qutqarý jumystary meniń tikeleı baqylaýymda. Sý tasqynymen kúresýge Tótenshe jaǵdaılar mınıstrliginiń barlyq resýrsy tartyldy. Sondaı-aq qutqarý jumystaryna İshki ister mınıstrligi, Ulttyq ulan, Qarýly Kúshter jáne Ulttyq qaýipsizdik komıtetiniń mamandary belsene atsalysyp jatyr. Zardap shekken aımaqtardyń ákimdikteri kúndiz-túni jumys isteýde. Ondaǵan myń volonter de kómektesip júr.
Jaǵdaı óte kúrdeli bolsa da, biz qıyndyqty mindetti túrde eńseremiz, barlyǵyn qalpyna keltiremiz. Eń bastysy – azamattardyń amandyǵy”,- dedi Prezıdent óz Úndeýinde.
Azamattardy alańdatqan basty suraqqa jaýap berildi. Qasym-Jomart Toqaev “Barshańyzǵa qarjylyq jáne basqa da kómek beriledi. Materıaldyq shyǵyndar tolyq óteledi”,-dedi.
Eń úlken máseleniń biri -osy alapat sý tasqynynan tıisti qorytyndy shyǵarý. Shuǵyl túrde jiberilgen olqylyqtardy túzetip, tıisti sabaq alý qajet. Eń aldymen sý sharýashylyǵy mamandarynyń tapshylyǵyn boldyrmaý, bul úshin sala mamandaryn oqytý jáne daıarlaý máselesi jedel sheshilgeni kerek.Úkimet jáne jergilikti atqarýshy organdar sý tasqynymen kúresti tıimdi úılestirip otyrýǵa tıis.
Jaǵdaıdyń qanshalyqty kúrdeli ekenin apatqa qarsy kúreske Qorǵanys mınıstrligi qosymsha áskerı kúshteriniń jumyldyrylýy baıqatsa kerek. Prezıdent el-jurtqa kómektesý úshin Úkimetke memlekettik materıaldyq rezervti paıdalanýdy tapsyrdy. Osynyń ózi eldegi tasqyn sý zardabynyń kólemi men mólsheri orasan úlken ekenin ańǵartady.
Memleket basshysy eldi túrli teris aqparatpen eldi dúrliktirmeýge shaqyrdy.
“Buqaralyq aqparat quraldaryna, belsendi azamattarǵa jáne blogerlerge aıtarym, jurtty dúrbeleńge salatyn jalǵan aqparattardy taratpaý qajet. Qazirgi ýaqytta bılik pen qoǵamdy uıystyratyn áreketter jasaý asa mańyzdy. Azamattardy tek qana resmı aqparat kózderine súıenýge shaqyramyn”,- dedi.
Sondaı-aq, Prezıdent qutqarý isine aralasyp jatqan azamattarǵa,tártip saqshylaryna, volonterlerge jáne apatpen kúresýge atsalysyp jatqan barsha jurtqa alǵys aıtty. “Osyndaı qıyn-qystaý kezde bir jaǵadan bas, bir jeńnen qol shyǵarý aıryqsha mańyzdy. Bir el, bir halyq bolyp jumylyp, bul apatty eńseremiz. Bul bizdiń qolymyzdan keledi”.
Keshe Qadir túninde barsha halyq tasqyn sýdan eldiń aman qalýyn tiledi. Búgin Prezıdent eldiń amandyǵyn qamtamasyz etý máselesin tıanaqty túrde qolǵa alǵanyn jetkizdi.