Elimizde sporttyń ár salasy qarqyndy damyp keledi. Sonyń ishinde jıý-jıtsý kúresi erekshe qarqyn alyp, jastar arasynda tanymal sport túrine aınaldy. Almaty qalasynda jáne Almaty men Jetisý oblystarynda arnaıy sport zaldaryn ashyp, jıý-jıtsýdyń damýyna eleýli úles qosyp júrgen, grepplıngten Azıa chempıony, jıý-jıtsýdan qara belbeý ıegeri Nursultan Orynbasarovtyń eńbegi bul baǵytta erekshe.
Sport – patrıotızmniń mektebi
Nursultan Orynbasarov negizin qalaǵan «Sagadat batyr-QTT» sport klýby elimizde ǵana emes, kórshiles Qyrǵyzstan men Reseıde ótken halyqaralyq týrnırlerde de úzdik nátıjeler kórsetip keledi. Sport klýbyna Saǵadat Nurmaǵambetovtiń esimin berý arqyly ol jastardy áskerı-patrıottyq rýhta tárbıeleýge den qoıdy.
«Básekege qabiletti memleket bolý úshin rýhy bıik, deni saý urpaq tárbıeleý qajet. Chempıon bolmasa da, Otanǵa adal qyzmet etetin azamattardy tárbıeleýdi maqsat etemiz», – deıdi sportshy.
Sportqa jol erte bastalady
Nursultan Orynbasarovtyń aıtýynsha, jıý-jıtsýǵa 4 jastan bastap bergen durys. Alaıda jas shekteýi joq, bul sport túrimen tipti 40 jastan asqan azamattar da aınalysa alady. Degenmen, balaǵa sportqa qyzyǵýshylyqty oıatý jáne onyń densaýlyǵyna zıan keltirmeý úshin bapkerdiń tájirıbesi mańyzdy ról atqarady.
«Jaqsy bapker balanyń jeńiske jetýine ǵana emes, onyń sportqa degen súıispenshiligin arttyrýǵa da úles qosady», – deıdi ol.
Chempıon bolý – tabandylyqtyń jemisi
Chempıon ataný úshin tek dene kúshi jetkiliksiz, aqyl-oı men minezdiń úılesimi qajet. Nursultan sportty úlken ǵylym dep esepteıdi.
«Sportta tehnıkalyq, taktıkalyq jáne psıhologıalyq daıyndyq qajet. Shet elde jıý-jıtsýdy "tatamıdegi shahmat" dep ataıdy. Bul shyndyqqa jaqyn. Ár ádisti oılanyp, kúrestiń taktıkasyn baǵamdap áreket etken sportshy ǵana jeńiske jetedi», – deıdi ol.
Jıý-jıtsý: sport arqyly tárbıe
Nursultan tek sportty úıretýmen shektelmeıdi. Ol balalardy adamgershilikke, tabandylyq pen ózara qurmetke tárbıeleýge erekshe nazar aýdarady.
«Sport – tárbıe men tabandylyqtyń mektebi. Biz sport arqyly balalardy shynshyl, batyl ári meıirimdi azamat etip tárbıeleýge tyrysamyz», – deıdi chempıon.
Jıý-jıtsý tek sport emes, adamdy jan-jaqty damytatyn ómir mektebi. Nursultan Orynbasarov sıaqty jandardyń eńbegimen bul sport túri elimizde keń qanat jaıyp keledi. Balalar úshin jańa múmkindikter ashylyp, sport arqyly ulttyq rýhty nyǵaıtý joly jalǵasýda.