Almatyda quqyq qorǵaý organdary ákimshilik aýmaqtarda qylmystyń aldyn alý sharalaryn kúsheıtti.
Qalada «Ýchaske» respýblıkalyq jedel-profılaktıkalyq is-sharasy ótkizilýde, oǵan jergilikti polısıa qyzmetkerleri, kóshi-qon qyzmeti, ekstremızmge qarsy kúres bólimsheleriniń ókilderi jumyldyrylǵan.
İs-shara bastalǵaly beri polısıa qyzmetkerleri 528 myńnan astam páter men jeke turǵyn úılerdi aralap shyqty. Nátıjesinde turǵylyqty jerinde tirkeýsiz turyp jatqan 4 myńnan astam azamat anyqtalyp, olardyń barlyǵy QR ÁQbK-niń 492-babyna sáıkes ákimshilik jaýapkershilikke tartyldy. Sonymen qatar profılaktıkalyq esepte turǵan 5 myń 363 adam tekserildi. Onyń ishinde otbasy-turmystyq qatynastar salasynda quqyq buzýshylyq jasaǵandar, sondaı-aq azamattyq qarýdyń 36 myń 335 ıesi tekserildi. Olarǵa profılaktıkalyq áńgime júrgizildi.
– Polısıa qyzmetkerleriniń mindeti – azamattarmen tyǵyz, senimdi qarym-qatynas ornatý, qylmystardyń aldyn alý, olardy anyqtaý, jolyn kesý jáne quqyq buzýshylyqtardyń aldyn alý, – dep atap ótti Almaty qalalyq PD jergilikti polısıa qyzmeti basqarmasy bastyǵynyń orynbasary Aıtan Eleýsizov.