«Taǵzym» - jańa dáýirdegi taǵdyrymyzdy anyqtaý.
Belgili memleket jáne qoǵam qaıratkeri Nurlan Orazalın Almaty shaharynda ashylǵan «Taǵzym» atty memorıalyna baılanysty óz pikirin ortaǵa saldy, dep habarlaıdy Almaty-akshamy.kz.
Arǵy keńestik dáýirdi, bergi táýelsizdik dáýirin aıtpaǵan kúnniń ózinde, Almaty - ejelden tamyryn tereńnen tartatyn, taý-tasy, topyraǵyna deıin sóılep jatqan uly shaharymyz. Mine, keıingi otyz jyl enshilep bergen bizdiń Almaty - azattyǵymyzdyń altyn besigi degen kıeli uǵymmen ult jadynda jattala bastady.
Osy jyldyń basynda oryn alǵan qańtar oqıǵasy sol altyn besigimizdiń basyna ǵana emes, Alash jurtynyń basyna qaıǵy bulty bolyp úıirilip, qabyrǵamyzdy qaıystyraǵanyn qalaı jasyramyz. Bul oqıǵaǵa memlekettik turǵydan, halyqtyq nemese ulttyq turǵydan qarasaq ta, bizdiń uly shejire-tarıhymyzǵa engen qasiretti kúnder. Keshe Almaty tórinde «Taǵzym» atty memorıal ashyldy. Onyń saltanatty ashylýynda sóz sóılegen Prezıdentimiz Qasym-Jomart Kemeluly Toqaev irgeli keshenniń sol el ishin bir sátte teńseltip tastaǵan qaraly kúnderdi umytpaý, odan sabaq alý jáne keler urpaqtyń qaıtalamaýy úshin ashylǵanyn atap ótti.
«Taǵzym» ótkenimizden sabaq beretindeı, qatemizdi, jibergen "áttegen-aılarymyzdy" kóz aldymyzǵa taǵy bir márte ákeletin jáne ult retinde, urpaq retinde bizge uıatymyzdy bekite bastaıtyn, ekinshiden, qaıǵy-qasiretimizden qorytyndy shyǵaratyndaı, namysymyzdy qamshylaıtyndaı ádemi bir arhıtektýralyq keshen bolyp shyǵypty. Biz muny kórip otyryp, keshegi qańtar qasireti kezinde jasaǵan qatelikterimizdi tanımyz.
Almatynyń ár tasy, ár kóshesi osyǵan deıin qalaı tarıh bolyp, tulǵalardyń taǵdyry bolyp sóılep, keshegi aýyr kúnderdiń kózindeı bolyp, til qatyp otyrsa, myna «Taǵzym» jańa dáýirdegi taǵdyrymyzdy anyqtaý, baǵytymyzdy belgileýge, birigip otyryp jańa sıpattaǵy jańa qoǵamda qalaı jasaý kerek degen saýaldarǵa jaýap tabýǵa kómektesetin tyń keshen dep oılaımyn. Tipti, erte dáýirdegi Kúlteginniń, keshegi Buqar jyraýdyń, Tóle bıdiń, Qaz daýysty Qazybek bıdiń, bertindegi Alashorda kósemderi Álıhan Bókeıhanov, Muhtar Áýezovtiń, kúni keshe qatarymyzda júrgen aqıyq aqyn Muqaǵalı Maqataev syndy tulǵalardyń qashap jazylǵan ulaǵatty sózderi otanshyl ulttyq urpaqty tárbıeleýge jáne artyńa burylyp qarap otyryp, aldyńdaǵy jolyńdy adaspaı tabýǵa kómektesetin keshen boldy bul.
Bul keshegi «Qańtar oqıǵasynyń» ǵana qasiretin eske salyp qoımaı, ózimizdi tanýǵa jeteleıdi. Bul poetıkalyq ulttyń óz múmkindigin ózi baǵalaýǵa baǵyttaıtyn úlken maǵynaly týyndynyń dúnıege kelgenin ańǵartady.
Sondyqtan aıbyny myqty, aıdyny keń, tamyry tereń, turpaty bólek halyqtyq rýhtaǵy memorıaldyq keshen úlken-kishige oı salary sózsiz.
