2022 jyldyń 14 qarashasynda QR Prezıdenttigine Jalpyulttyq sosıal-demokratıalyq partıasy atynan kandıdat Nurlan Áýesbaev Mańǵystaý oblysyna saparmen kelip, Janaózen qalasyndaǵy «Bilim-Innovasıa» lıseıi ǵımaratynda saılaýshylarmen kezdesý ótkizdi.
İs-shara barysynda kandıdat jınalǵan qaýymǵa óziniń saılaýaldy baǵdarlamasynyń basym baǵyttary jóninde baıandap berdi.
Nurlan Áýesbaevtyń pikirinshe, munaı-gaz salasy el búdjetiniń basym bóligin quraıdy. Degenmen atalmysh óńir ınfraqurylym jaǵynan artta qalǵan aımaqtardyń biri bolyp sanalady. Munyń bári teńgerimsiz óńirlik saıasattyń saldary. JSDP-dan kandıdat barlyq deńgeıli, onyń ishinde oblystyq ákimderdi saılaýdy engizý arqyly bul tyǵyryqtan shyǵýǵa bolady dep esepteıdi.
Reformalardyń biri retinde búdjettik prosedýralardy jetildirý usynylady. Ár eldi mekende ózine tıesili ashyq búdjet jasaqtalyp, naqty ýaqyt rejıminde onlaın túrde memleket aqshasynyń qalaı jáne qaıda jumsalyp jatqandyǵy ashyq kórsetilip otyrylýy tıis.
Budan bólek Nurlan Áýesbaevtyń saılaýaldy baǵdarlamasynda qazaqstandyqtardyń ómir sapasynyń Standartyn engizý usynylady. Standartta azamattarymyzdyń sapaly tamaqtanýynan bastap, demalysyna deıingi barlyq qajettilikteri qarastyrylýy qajet.