«Sezual» qoǵamdyq birlestiginiń negizin qalaýshy Ǵalymjan Ǵabdreshevtiń búginge deıin oılap tapqan ázirlemeleriniń deni zaǵıp jandardy qoǵam tirliginen shet qaldyrmaı ómirlerin jeńildetýge baǵyttalǵan.
Braıl qarpin úıretýge arnalǵan jatyǵý qurylǵysy men bıolokasıalyq dybystyq apparat osyny kózdeıdi. Bes jyl buryn er adam kózin aýyr jaraqattap alǵan. Kórý qabileti qaıtqanymen dárigerler kez-kelgen ýaqytta er adam soqyr bolyp qalýy múmkin ekenin eskertti. Sol kezde ónertapqysh kómekshi qurylǵylardy ázirleýmen aınalysýǵa bel býady. Ondaǵy alǵashqy tyń oılarynyń biri - bıolokator, dep habarlaıdy Almaty-akshamy.kz.
Onyń kómegimen kórý qabiletinen múldem aıyrylǵan adamdar aınalany tanyp, saıahattaı alady, tipti velosıped tebýge úırenedi.
«Adamnyń mıy túrli dybystardyń kómegimen túngi janýarlar sıaqty aınalany tanyp, kóre alady. Iaǵnı biz jaryq tolqyndarynyń kómegimen vızýaldy beınelerdi qalyptastyramyz. Jaı ǵana dybystyq jaryq beretin qondyrǵy qurǵan joqpyz. Sonymen qatar mıdyń kórý qyrtysyn jattyqtyrýǵa arnalǵan tehnologıany ázirledik. Osylaısha, naqty beınelerdi elestete alamyz. Dál osy oı bizdi esh jerde balamasy joq ónertabysty júzege asyrýǵa negiz boldy», - deıdi qazaqstandyq ǵalym, ǵylym kandıdaty Ǵalymjan Ǵabdreshev.
Dúnıejúzilik zıatkerlik menshik uıymy jáne múgedektigi bar adamdarǵa arnalǵan ınovasıalar salasyndaǵy eýropalyq ǵalymdar keńesi shyǵarǵan qorytyndyǵa saı qazaqstandyq bıolokator zaǵıp jandardyń kórý qabiletin tolyqtaı almastyrýǵa múmkindik beretin alǵashqy ónertabys dep tanyldy. Qazirgi tańda qurylǵy ǵylymı-zertteý jáne tájirıbelik-qurastyrý kezeńnen komersıalandyrýǵa kóshýde. Qazaqstandyq jobaǵa Amerıkanyń ǵalymdary úlken qyzyǵýshylyq tanytyp otyr. Ǵalymjan Ǵabdreshevtiń endi bir biregeı ónertabysy «fısh lokamoýshn» dep atalatyn monoeskekaıaq. Ol sýda júzý arqyly ishinde tolqyn tárizdi qımyldar jasaýǵa múmkindik beredi. Ǵalym bundaı ádis osteohondroz, skolıoz, omyrtqaaralyq dıskilerdiń shyǵyp ketýi syndy aýrýlardan arylýǵa jáne jalpy densaýlyqty jasartýǵa septigin tıgizetinin aıtady. Ázirge, Ǵalymjan barlyq zertteýlerdi ózi synap júr.
«Biz jumysymyzdy tirek-qımyl júıesi men býyndardyń qozǵalysyna qatysty barlyq qajetti aqparatty jınaýdan bastadyq. Keıin júrgizgen barlyq zerteý nátıjeleri oń dınamıkany kórsetti. Biz bıohımıalyq saraptamalar júrgizý arqyly aǵzadaǵy qan quramynyń jaqsarǵanyn baıqadyq. Tipti salmaqtyń tómendeýine áseri mol boldy. Hırýrgıalyq jolmen emdeýge bolmaıtyn 20-dan astam omyrtqa, julyn aýrýlaryna shıpasy tıdi», - deıdi ońaltý ortalyǵynyń bas dárigeri Asqar Baımaǵambetov.
Otandyq ǵalym óz aldyna múmkindigi shekteýli jandar úshin tutas ekojúıe qurý mindetin qoıyp otyr. Onyń qolymen jasalǵan biregeı ónertabystardy álem moıyndady. Sheteldik kompanıalardan jobanyń quqyqtaryn satyp alýǵa qatysty talaı usynys túsken. Álide buǵan nıettiler az emes deıdi ol. Ǵalymjan avtorlyqty ıemdenýdi kózdeıtin bul usynystardyń bárinen bas tartyp, bastamalaryn elimizdiń atynan nasıhattap júr. Endigi maqsaty memlekettiń qoldaýymen ınvestısıa taýyp jobalaryn óndiristik jolǵa qoıý.