Qonaev qalalyq mádenıet úıinde Almaty oblysy ákimdiginiń qoldaýymen kompozıtor, dırıjer, kúıshi, Qazaqstannyń Halyq artısi Nurǵısa Tilendıevtiń 100 jyldyǵyna oraı, «Nurǵısa jylynyń» saltanatty ashylýy ótti. Aıtýly is-sharaǵa oraı, Almaty qalasy mýzeıler birlestigine qarasty Nurǵısa Tilendıev memorıaldy mýzeıiniń jyljymaly kórmesi uıymdastyrylyp, 70-ke jýyq eksponat qoıyldy.
«Nurǵısa jylynyń» ashylý rásimine Almaty qalasy men Almaty oblystyq máslıhat depýtattary men qoǵamdyq keńes músheleri, aýdan, qala ákimderiniń orynbasarlary, aýdandyq, qalalyq mádenıet, tilderdi damytý, aýdandyq, qalalyq Mádenıet úıleriniń dırektorlary qatysty. Saltanatty keshti Almaty oblysynyń ákimi Marat Sultanǵazıev ashyp, qaıtalanbas óner ıesiniń ǵasyrlyq toıy aıasynda qolǵa alynyp jatqan jumystarmen tanystyrdy. Kelesi kezekte Qazaqstan Respýblıkasy Prezıdentiniń keńesshisi Málik Otarbaev sóz alyp, Memleket basshysynyń ystyq yqylasty lebizin jetkizdi.
Kesh barysynda QR eńbek sińirgen qaıratkerleri Meırambek Bespaev, Tamara Asar, Aıgúl Qosanova, Mádına Sádýaqasova, qazaq estradasynyń jaryq juldyzdary Mıras pen Quralaı, Gúlnur Orazymbetova Nurǵısa Tilendıevtiń ánderin náshine keltire shyrqady. Sondaı-aq, teatr akteri Edil Ramazan men Aqbota Rahat Nurǵısa Tilendıev ómirine arqaý bolǵan aqyndardyń jyryn oqysa, «Nurǵısa ómirge keldi» atty qoıylym da shynaıy shyqty. Saltanatty keshke «Altynaı» memlekettik halyq bıi ansambli, Súıinbaı atyndaǵy Almaty oblystyq fılarmonıasy, «Úshqońyr» fólklorly-etnografıalyq ansambli ónerpazdary qatysyp, kompozıtordyń shyǵarmalaryn oryndady. Qazaq topyraǵynda bastalǵan «Nurǵısa jyly» qońyr kúzde Parıjde qorytyndylanatyn bolady.
Taqyrypqa oraı
Dinzýhra TİLENDİ, Qazaq memlekettik akademıalyq «Otyrar sazy» fólklorly etnografıalyq ansámbl jetekshisi:
Men úshin ákemniń barlyq shyǵarmalary qymbat
Kesh boıy ózimdi ázer ustap, tolqyp otyrdym. Ákemniń barlyq shyǵarmalary men úshin qymbat. Árbiri maǵan tanys, bala kúnimnen qulaǵymda qaldy. Men sol áýenmen óstim. Qazir ákemniń amanatyn arqalap, salyp ketken dara jolymen kelemin.
Danıar ÁLIEV, Almaty oblysynyń mádenıet, arhıvter jáne qujattama basqarmasynyń basshysy:
Nurǵısa atyndaǵy Mádenıet saraıy ashylady
Osynaý mereıtoı aıasynda oblys kóleminde ótiletin is-sharalardyń jospary bekitildi. Respýblıkalyq, halyqaralyq deńgeıdegi is-sharalar ótetin bolady. Qazirgi tańda uly kompozıtordyń týǵan jerinde úlken Mádenıet saraıy boı kóterip jatyr. Sátin salsa, sol mádenıet ordasyna Nurǵısa Tilendıevtiń esimi berilip, eskertkishi ashylady. Sosyn Pekınde úlken merekelik is-shara ótedi. Bul bolmysy bir qalypqa syımaıtyn tulǵaǵa degen halqynyń qurmeti.