Ábilhan Qasteev atyndaǵy QR Memlekettik óner mýzeıinde qordan alynǵan jádigerlerden turatyn «Qazaqstannyń kitap grafıkasyndaǵy ulttyq epos» kórmesi ashyldy, dep habarlaıdy aqshamnews.kz
Kórmede 90-ǵa jýyq grafıkalyq jumys, sonymen qatar, ulttyq epostyń qazynalaryn saqtaıtyn sırek basylymdar usynylǵan. Kelýshiler klasıkalyq oforttan bastap, túpnusqa grafıkaǵa deıingi túrli kórkemdik tehnıkada oryndalǵan ańyzǵa aınalǵan batyrlardyń, arýlar men danalardyń jáne mıfologıalyq keıipkerlerdiń jarqyn beınelerin tamashalaı alady. Ár týyndy sýretshilerdi ádebı materıaldy tereń túsinýge shabyttandyrǵan ulttyq epostyq jyrlardyń sújetteri men beıneleriniń baılyǵyn kórsetedi.
Kórmede erekshe oryn alǵan jumystardyń qatarynda Ábilhan Qasteevtiń «Qobylandy batyr» (1932), Áýbákir Ysmaıylovtyń «Qazaq halqynyń epostyq jyrlaryna ılústrasıalar» (1928), «Qobylandy batyr» (1941) jáne «Alpamys batyr» (1943), Konstantın Baranovtyń «Bozjigit» pen «Aıman-SHolpan» (1941), Evgenıı Sıdorkınniń «Alpamys batyr» (1976-1977) jáne «Qyz Jibek» (1973) jyrlaryna arnalǵan grafıkalyq paraqtary men ılústrasıalary bar. Olardyń jumystary keıipkerlerdiń emosıonaldyq áserliligimen, jarqyn merekelik atmosferasymen jáne ustamdy monýmentaldylyǵymen erekshelenedi.
– Arsen Beısembınovtyń «Qozy Kórpesh – Baıan Sulý» eposyna jasaǵan grafıkasy tereń kórkemdik oıǵa toly. Aǵymsaly Dúzelhanovtyń «Aıman-SHolpan» shyǵarmasyna arnalǵan ılústrasıalary lırızm men pishinderdiń jumsaq plasıkasymen erekshelenedi. Hasen Abaevtyń «Qambar batyr» eposyna arnalǵan eńbekteri kórermendi ejelgi batyrlyq erlikter álemine jeteleıdi. Muryn jyraý beınesinen shabyt alǵan Temirhan Ordabekovtyń týyndylary qazaq mádenıetinde epıkalyq jyrshylardyń mańyzdylyǵyn aıshyqtaıdy. Joǵaryda atalǵan jáne ózge de kóptegen grafıkalyq týyndylar ǵasyrlar boıy urpaqtan-urpaqqa jalǵasyp, qazaq halqynyń mádenı kody men rýhanı qundylyqtaryn saqtaǵan epostarǵa jańa kózqaraspen qaraýǵa múmkindik beredi, – deıdi kórme jetekshisi Samal Mamytova.