Elordada qazaqtyń uly aqyny Abaı Qunanbaıulynyń týǵan kúnine oraı «Abaı mereıtoıy» atty kitaptyń tusaýkeser rásimi ótti, dep habarlaıdy almaty-akshamy.kz QazAqparat tilshisine silteme jasap.
L.N. Gýmılev atyndaǵy Eýrazıa ulttyq ýnıversıteti aıtýly aqynnyń týǵan kúnine oraı uıymdastyrylǵan «Adamzattyń bárin súı, baýyrym dep» atty onlaın dáris- konsertiniń aıasynda «Abaı mereıtoıy» atty kitaptyń tusaýy kesildi.
«Osyndaı aıtýly data álemdi jaılaǵan indettiń saldarynan onlaın túrde ótip jatyr, ókinishti. Degenmen rýhymyz myqty. Abaı sekildi uly aqynnyń týǵan kúni Qazaqstan ǵana emes, álemdik deńgeıde atalyp ótilýde. Onyń dáleli búgingi sharany tek qazaqstandyqtar ǵana emes, álemniń túkpir-túkpirindegi qandastarymyz tamashalap otyr. Ótken jyly Memleket basshynyń Jarlyǵymen Abaı kúni keń aýqymda atalyp ótti. Mereıtoı onymen bitken joq, bıyl da jalǵasyn tabýda. Biz de óz tarapymyzdan bir kisideı atsalysyp jatqan jaıymyz bar», - dedi «Otandastar» AQ-nyń vıse-prezıdenti Maǵaýıa Sarbasov aıtýly sharada.
Avtorlardyń málimdeýinshe, kitapqa ABAI TV telearnasynyń ashylýy, ǵylymı konferensıalar men sımpozıýmdar, mereıtoılyq monetalar men markalar, shetelderdegi Abaı eskertkishteri, saıabaqtar, kósheler men mádenı-aqparattyq ortalyqtardyń ashylýy sıaqty mereıtoı jylynda atqarylǵan mańyzdy oqıǵalar engen.
Sondaı-aq, atalǵan sharada Abaı shyǵarmalarynyń japon, koreı, túrik, aǵylshyn, qyrǵyz, portýgal, arab, ıtalán, qytaı jáne álemniń basqa da kóptegen tilderine aýdarylyp shyǵatyny aıtyldy.