Abaı kúni Almaty qalasy boıynsha Qylmystyq atqarý júıesi departamentine qarasty LA-155/6 túzeý mekemesinde de uly aqynǵa arnalǵan onlaın is-shara ótti, dep habarlaıdy almaty-akshamy.kz.
Dálirek aıtsaq, Almaty qalalyq «Jas Otan» jastar qanatynyń úılestirýshileri osy mekemede jazasyn ótep jatqan balalar arasynda ZOOM júıesi arqyly «Bes nársege asyq bol» atty konferensıa uıymdastyrdy. Onda Beıbarys Zarıpov kolonıadaǵy jasóspirimderdi Abaıdyń ómirbaıanymen tanystyryp, onyń ǵıbratty sózderiniń mán-maǵynasyn ashatyn áńgime ótkizdi. Sondaı-aq, ol aqyn ómirinen túrli derekterge qanyqtyryp, suraq-jaýap tásilimen balalardyń Abaı týraly dúnıetanymyn arttyrdy.
Óz kezeginde LA-155/6 túzeý mekemesinde jazasyn ótep júrgen jasóspirimder Abaıdyń óleńderin jatqa oqyp, ónerlerin ortaǵa saldy. Jas ánshi Turar Dúısekesh Abaı Qunanbaevtyń sózine jazylǵan ánderdi oryndap, keshke qatysýshylardyń kóńilin bir serpiltti.
Abaı shyǵarmalary da jazaly balalardyń ómirine baǵdarsham bolyp, olar jamandyqqa emes, tek jaqsylyqtarǵa asyq bolyp júredi dep bilemiz.