III Nobel Fest sharasyn memlekettik emes uıymdar uıymdastyryp otyr
Elimizde ǵylymı-bilim berý áleýetin damytý maqsatynda III Nobel Fest sharasy onlaın formatta ótedi, dep habarlaıdy Almaty-akshamy.kz Egemen.kz-ke silteme jasap.
Nobel Fest - jylyna eki ret ótkiziletin Eýrazıa qurlyǵyndaǵy eń aýqymdy jáne bedeldi is-sharalarynyń biri. Onyń aıasynda Nobel syılyǵy laýreattarynyń dáristeri ótedi. Sharanyń negizgi maqsaty – QR, Ortalyq Azıa, Kavkaz memleketterindegi túrli salada jumys isteıtin azamattarǵa álemdegi eń myqty Nobel syılyǵy ıegerlerimen, belgili ǵalymdarmen, bıznes salasyndaǵy tanymal adamdarmen jumys isteýge múmkindik berý. Bul týraly Ortalyq komýnıkasıalar qyzmetinde ótken brıfıńte G-Global Halyqaralyq Hatshylyǵynyń basshysy Serik Nógerbekov málim etti.
Onyń aıtýynsha, qazirgi zamandaǵy eń basty másele – adamı kapıtal. On jyl buryn álemdegi eń qymbat kompanıalar shıkizat pen qarjy salasyndaǵy kompanıalar bolsa, búginde eń úzdik 10 kompanıanyń 8-i adamı kapıtaldy keńinen paıdalanatyn tehnologıalyq ınovasıalyq kompanıa bolyp tabylady.
«Mysaly, buryn ǵalymdar negizinen bilim jáne ǵylym salasynda jumys istese, qazir kompanıalar janynan úlken ǵylymı ınstıtýttar qyzmet etedi. Olar ǵalymdardyń adamı kapıtaldardy keńinen paıdalanýynyń arqasynda úlken jetistikterge, progreske qol jetkizip otyr. Damyǵan elderde jastar, stýdentter, ustazdar men Nobel syılyǵynyń laýreattary, úlken ǵalymdar arasynda kezdesýler ótkiziledi. Ókinishke qaraı, damýshy elderde ondaı kezdesýler az. III Nobel Fest sharasyn memlekettik emes uıymdar uıymdastyryp otyr. Úshinshi Nobel festıvaliniń aıyrmashylyǵy – ony jalǵyz Qazaqstanda ǵana emes, Ózbekstanda, Ázerbaıjanda ótkizip jatyrmyz. Bolashaqta sharany odan ári damytý josparlanǵan. Áriptesterimnen festıváldi keńinen nasıhattaýlaryn suraımyn. Sebebi adamdar neǵurlym kóp qatyssa, soǵurlym tıimdi bolady», dedi S.Nógerbekov.
G-Global halyqaralyq hatshylyǵynyń basshysy festıváldiń tegin ótkiziletinin atap ótti. Qatysýshylar dáriskerlerge suraq qoıa alady, sondaı-aq, bilim alady.