Pavlodarlyq Oljas Nurlanov «74th Coupe Mondiale» halyqaralyq baıqaýynda jeńiske jetti
Pavlodar oblysynyń 22 jasar týmasy osy ýaqytqa deıin 30-dan astam halyqaralyq baıqaýdyń bas báıgesi men júldesin alyp úlgergen. Al álem kýbogy baıqaýy – akordeonshylar halyqaralyq konfederasıasy jyl saıyn ótkizetin akordeon oryndaýshylarynyń saıysy, dep habarlaıdy Almaty-akshamy.kz Kursiv.kz-ke silteme jasap.
Alǵash ret 1938 jyly Parıjde ótken baıqaý bıyl Múnhen qalasynda 13-17 qazan aralyǵynda uıymdastyryldy. Chempıon ataǵy úshin búkil álemniń oryndaýshylary baq synady.
Oljas óner kórsetken «Senior Coupe Mondiale» sanatyndaǵy baıqaý úsh týrdan turdy. Baıqaý fınalyna jeti mýzykanttyń tórteýi ǵana ótti.
Pavlodarlyq talanttyń oryndaýyndaǵy Iogann Sebastán Bah, Domenıko Skarlattı, Ferens Lıst, Mıhaıl Glınkanyń shyǵarmalary qazylar alqasy tarapynan joǵary baǵalandy.
«Álem kýbogy – árbir kásibı syrnaıshy úshin erekshe syılyq. Men bul maqsatqa jetýge bala kezimnen tyrystym, barymdy saldym. Osyndaı jetistikke jetýge sebepker bolǵa ustazdaryma, qoldaý kórsetken janashyr jandarǵa alǵys aıtamyn»,-deıdi ónerpaz.
Oljas Nurlanov 1999 jyly Pavlodar qalasynda dúnıege kelgen. 6 jasynda daryndy balalarǵa arnaǵan mýzykalyq mektep-ınternattyń baıan synybyna oqýǵa tústi. Mýzykalyq kolejde Tatarstan Respýblıkasynyń Eńbek sińirgen ártisi, profesor, «Qurmet» ordeniniń kavaleri Damır Sýltanovtan sabaq aldy. 2018 jyly bilimin Reseı mýzyka akademıasynda jalǵastyryp, Reseı Federasıasynyń Halyq ártisi, profesor Lıps Frıdrıh Robertovıchtiń klasynda tálim aldy.
Qazirgi ýaqytta Lúdmıla Zykına atyndaǵy «Rossıa» ansambliniń solısi bolyp eńbek etedi.