Ánshiler ózderi úshin bul úlken mártebe ekenin aıtty.
Ninety One músheleri balalar quqyǵyn qorǵaý jáne nasıhattaýmen aınalysatyn álemdegi tanymal tulǵalardyń qataryna qosyldy, dep habarlaıdy Almaty-akshamy.kz
"IýNISEF bizdiń elde ǵana emes, búkil álemde úlken jumys atqaryp keledi jáne biz bul jumysqa qoldaý kórsetý múmkindigine ıe bolǵanymyzǵa óte qýanyshtymyz. Mýzyka adamdardy jaqyndastyrady. Osy rette biz de mýzykamyzdyń kómegimen adamdardyń júregine jol taýyp, sanasyn qozǵap, Qazaqstan balalaryn mazalaıtyn mańyzdy máselelerdi aıta alamyz dep úmittenemiz", - dedi top músheleriniń biri.
IýNISEF-tiń Qazaqstandaǵy izgi nıet elshileri retinde bul top balalardyń onlaın jáne oflaın rejıminde kezdesetin túrli qıyndyǵy týraly qoǵamnyń habardarlyǵyn arttyrýǵa kómektesedi. Bul rette ınternettegi psıhıkalyq densaýlyq pen qaýipsizdik máselesine erekshe nazar aýdarylmaq. Top músheleri balalardyń quqyǵyn qorǵaý úshin buqaralyq aqparat quraldaryn paıdalanyp, olar arqyly jastardy tolǵandyratyn máselelerge de nazar aýdarmaq.