Olımpıada - árbir sportshy úshin asqaq arman.
Osy arman Nazym Qyzaıbaıdy da alǵa jetelep, boksshy 51 keli salmaqqa aýysty. Bul Olımpıada baǵdarlamasyna engen sanaýly salmaqtardyń biri edi. 2015 jyldan bastap Qyzaıbaı resmı túrde 51 kelige ótti. Biraq olımpıadalyq salmaqtyń ózindik aýyrtpalyqtary da jıi jolyn bógeı berdi, dep habarlaıdy aqshamnews.kz.
Birde bas bapker senim artpady, endi birde Nazymnyń baǵy janbady. Osylaısha, Qyzaıbaı 2016 jylǵy Rıo jáne 2020 jylǵy Tokıo Olımpıadalarynan syrt qaldy.
Parıj Olımpıadasyna aparatyn jol da boksshy úshin ońaı bolǵan joq. Aldymen Nazym Hanchjoýda ótken jazǵy Azıa oıyndarynda sátsizdikke ushyrap, joldamadan qaǵyldy.
Keıin Italıada ótken álemdik irikteý týrnırine bapkerler osy salmaqqa aýysqan taǵy bir tanymal boksshy Alýa Balqybekovaǵa senim artty. Alaıda, bul salmaqtaǵy kezekti joldama Alýaǵa da buıyrmady.
Taılandta ótken eń sońǵy irikteý týrnıri Nazymnyń sporttyq mansabyndaǵy eń sheshýshi saıys edi. Biraq bul jarysqa birinshi nómirli boksshy retinde tikeleı barýdyń da sáti túspedi. Qyzaıbaı ulttyq qurama bapkerleri uıymdastyrǵan sparrıngtik týrnırge qatysyp, Alýa Balqybekovany senimdi túrde jeńgen soń ǵana, irikteý týrnırinde qatysý múmkindigin aldy.
"Men Azıa oıyndarynyń shırek fınalynda, joldamaǵa bir qadam qalǵanda súrindim. Alýa Italıadaǵy týrnırdiń shırek fınalynda utyldy. Úshinshi irikteý kezeńi qarsańynda sparrıng jasaý – óte durys sheshim. Buǵan deıin qansha jerden birinshi nómirli boksshy bolsam da, Olımpıadaǵa bara almadym. Sparrıngsiz-aq, ornyma basqalardy jiberetin.
Bul joly máseleniń sparrıng arqyly sheshilýi eshkimniń kókeıinde kúmán qaldyrmaıdy degen oıdamyn. Men eshqashan básekelestikten qashqan emespin. Kim myqty, sol barsyn. Jastarǵa oryn bermedi degen pikirdi de istep júrmin. Biz jas bolǵanda, eshkim de ornyn bosatyp bermegen. Sondyqtan, ózimdi laıyqty boksshy sanaımyn», - degen edi Nazym týrnır qarsańynda.
Nazym Qyzaıbaı úshin úlken eńbekpen, ózin dáleldeýmen kelgen Olımpıada joldamasynyń synǵa túser mańyzdy kúni - búgin bolǵaly tur. Esterińizge sala keteıik, búgin namysty qyz - Nazym Qyzaıbaı jartylaı fınalda 2023 jylǵy álem chempıony, AO-2023 chempıony, qytaılyq Vý Iýmen (52 kg) kezdesedi.