Búgin Astana qalasynda Qazaqstan Respýblıkasy Ulttyq qaýipsizdik komıtetiniń ardageri otstavkadaǵy polkovnık Jeńis Rashıtuly Ramazanovty eske alýǵa arnalǵan shahmattan týrnır ótti. Atalmysh sharaǵa arnaıy organdar ardagerleri men saptaǵy qyzmetkerler jáne otbasy músheleri qatysyp, baq synasty, dep habarlaıdy aqshamnews.kz.
Týrnır aınalmaly ádispen, 7 oıynnan turdy. Barlyq qatysýshylar ózara bir oıyn ótkizdi. Shara uıymdastyrýshylary - QR UQK Ardagerler keńesi aldymen Jeńis Rashıtulynyń ómir jolyna toqtaldy.
-Jeńis Rashıtulynyń ómirlik joly kóptegen qyzmetkerler men jas býyn ókilderi úshin úlgi. Onyń Otanǵa degen rıasyz súıispenshiligi men mamandyqqa degen sheksiz mahabbaty kásibı qasıetterin tolyqtyryp turatyn. Polkovnık Jeńis Ramazanovpen birge qyzmet atqarǵan adamdar onyń tek jaqsy qasıetterin eske túsiredi. Búgingi týrnırdiń máni de aǵa býyn ókilderiniń eńbek joly negizinde óskeleń urpaqty tárbıeleý,-dedi "QR UQK Ardagerler keńesi" RQB -niń tóraǵasy polkovnık Kenjebolat Beknazarov.
Ómirlik jary Raısa Rahymjanqyzy bolsa, keıipkerimizdiń otbasyndaǵy ustanymy, tálim-tárbıesi jáne ómirlik kózqarastary týraly tyn derektermen bólisti. Sondaı-aq, polkovnık J. Ramazanovtyń uly Bolat Jeńisuly da kelip, ákesi týraly estelikterin aıtyp ótti.
-Men ákemniń jolyn jalǵastyryp kele jatqanyma dán rızamyn. Ákem ómirden qaıtar tusta, balalaryn ósirgenine, shákirtterin oqytqanyna jáne arnaıy organdarda mamandyǵyna adal bolǵanyna ómirge alǵysy sheksiz ekenin aıtqan. Shyn máninde, ákemniń atyn óshirmeı, osyndaı týrnır uıymdastyryp otyrǵan UQK basshylyǵyna, Ardagerler keńesine óz rahmetimdi aıtamyn, - dedi uly Bolat Jeńisuly.
Týrnır óz máresine jetti. Saptaǵy ulttyq qaýipsizdik komıtetiniń qyzmetkerleri jeńis tuǵyryna kóterildi. Aldyńǵy úsh oryn ıeleri kýbok medaldarmen jáne Ramazanovtar daıyndaǵan baǵaly syılyqtarmen marapattaldy. Jarys uıymdastyrýshylardyń biri Astana qalasy boıynsha Shahmat federasıasynyń jetekshisi, UQK organdarynyń ardageri otstavkadaǵy general-maıor Abylaı Tastanbekov birinshi oryn jeńimpazyn óz qolymen marapattap, kelesi týrnırde jeńimpazdarǵa aqshalaı syıy tólenetinin aıtyp ótti. Ekinshi oryn jeńimpazyn Raısa Rahymjanqyzy marapattasa, úshinshi oryndy keıipkerimizdiń úzeńgiles dosy, otstavkadaǵy general-maıor Naǵashybaı Atshabarov marapattady.
Shara sońynda aq dastarhan jaıylyp, marqumnyń árýaǵyna arnap quran oqyldy.
Aıtyp ótý kerek, Jeńis Rashıtuly 1944 jyly 5 tamyzda qazirgi Soltústik Qazaqstan oblysy Iavlenka aýylynda dúnıege kelgen. 1963 jyly óz erkimen Otan aldyndaǵy azamattyq boryshyn atqarýǵa attanyp, Qıyr Shyǵystyq áskerı okrýgtiń strategıalyq mańyzǵa ıe raketalyq áskerdiń vzvod komandıriniń orynbasary bolyp áskerı qyzmetin atqarǵan. Keıin Iavlenka aýlynda aýdandyq halyq depýtattary keńesindegi atqarýshy komıtetiniń azamattyq qorǵanysynyń shtab bastyǵy bolyp qyzmet etedi.1967 jyly Máskeý qalasyndaǵy F.E. Dzerjınskıı atyndaǵy Qyzyl Týly Joǵary mektebine oqýǵa túsedi. Japon tilin meńgergen zańger mamandyǵyn ıelengennen soń ol Týla oblystyq MQK basqaramasynda arnaıy organdarda alǵashqy qyzmetin bastaıdy. 1980 jyly ataqty Máskeý olımpıadasyndaǵy qaýipsizdik sharalaryn qamatasyz etýge qatysady. Ózin úzdik qyrynan tanyntqan Jeńis Ramazanov MQK Tóraǵasynyń gramotasymen marapattalady. Keıin týǵan eline oralyp, MQK basqarmasynda jumys jasaıdy. 1988 jyly ozat ofıser retinde QazSSR MQK Ortalyq apparaty 5 basqarmasyna bólim basshysy laýazymyna taǵaıyndalady. 1991 jyly elimiz táýelsizdik alǵan jyldary QR UQK Inspeksıasynyń bas ınspektory bolyp qaltqysyz qyzmetin jalǵastyrady. 1994-1997 jyldar aralyǵynda basqarma basshysynyń orynbasary retinde talaı qyzmetter men bólimderge basshylyq jasaıdy.
Qurmetti eńbek demalysyna shyqqannan keıin QR UQK Akademıasynda ustazdyq etip, ómirlik tájirıbesimen bólisti. Arnaıy organdardaǵy ónegeli qyzmeti barysynda ózinen keıin birtalaı býyndy tárbıeledi. Kóptegen shákirtterdi ósirdi.
Bolashaq barlaýshylardy daıyndaıtyn oqý ornyndaǵy qurmet taqtasynda Jeńis Rashıtulynyń sýreti áli kúnge deıin ilinip tur. Sonda «Men ózimdi baqytty sanaımyn. Óıtkeni mamandyǵymdy satpadym, ulttyq qaýipsizdikti qamtamasyz etip kelemin»,-deıtin sózderi jazylǵan. Astana qalasynda ardagerimiz QR UQK «Barlaý» qyzmetiniń «Qorǵan» ortalyǵyna ustazdyq etken. Vedomstvalyq «Aqıqat» jýrnalyna maqala jazyp, oılarymen bólisken. Sonymen qatar, vedomstvalyq «Ardager» jýrnalynyń negizin qalaýǵa atsalysty. Ózi de qolyna qalam ustap kólemdi – kólemdi maqalalar jazdy. BAQ – na shyǵyp óz oıymen ashyq bólisetin. Astana jáne Almaty qalalarynda lańkestikke qarsy halyqaralyq ǵylymı – tájirıbelik konferensıalarǵa qatysyp, baıandamalaryn jasaǵan. Zamannyń ajdahasy sanalatyn – lańkestikpen kúres týraly bir talaı eńbekteri bar. Qyzmet barysynda 20 vedomstvalyq marapattarmen marapattalǵan.