Konstıtýsıadan Elbasy degen sóz alynyp tastaldy.
Al Elbasy men onyń otbasyn qorǵaıtyn, artyqshylyqtar beretin Tuńǵysh Prezıdent týraly zańnyń kúshi joıylady, dep habarlaıdy Almaty-akshamy.kz.
Bul týraly Májilis spıkeri Erlan Qoshanov aıtty.
«Konstıtýsıada tek qana memlekettiń negizin qalaýshy degen tarıhı róli ǵana qaldy. Sondyqtan Konstıtýsıa qabyldanǵannan keıin, Tuńǵysh Prezıdent týraly Konstıtýsıalyq zań da kúshin joıady dep kútilýde», - dedi Qoshanov.
Ol Konstıtýsıadan Elbasy degen sóz alynyp tastalǵanyn aıtty.
Sonymen qatar, Qoshanovtyń aıtýynsha, Nazarbaevqa qatysty eks-prezıdent týraly norma qoldanylady. Búginde bul norma Konstıtýsıada da, prezıdent týraly zańda da bar. Bul rette májilis tóraǵasy eks-prezıdent týraly norma Nazarbaevqa qandaı quqyq pen quzyret beretinin naqtylady.
«Birinshiden, ar-namysy men abyroı-bedelin qorǵaýǵa quzyret beredi. Ekinshiden, áleýmettik jaǵynan qorǵaý, ıaǵnı zeınetaqysy, kóligi, kúzeti bar. Osy máseleler memleket tarapynan retteledi», - dedi ol.
Ol jerde Nazarbaevtyń otbasyn jaýapqa tartýǵa qatysty norma bar ma degen suraqqa spıker «ondaı norma joq» dep jaýap berdi.
Aıta keteri, 2000 jyly «Qazaqstan Respýblıkasynyń Tuńǵysh Prezıdenti - Elbasy týraly» Konstıtýsıalyq zań qabyldanǵan bolatyn. Oǵan sáıkes, Nursultan Nazarbaev pen onyń otbasy músheleri qorǵalady.
Konstıtýsıalyq zań boıynsha Nazarbaevty ustaýǵa, qamaqqa alýǵa, tintýge, odan jaýap alýǵa ne jeke basyn jete tekserýge, kúzetpen ustaýǵa bolmaıdy.
Sonymen qatar, Elbasy men onymen birge turatyn otbasy múshelerine tıesili barlyq jeke múlikke tıisýge jáne shekteý qoıýǵa bolmaıdy.
Jeke múlikke turǵyn jáne qyzmettik úı-jaılar, qyzmettik kólik, baılanys quraldary, hattar, qujattar kiredi. Tıispeýshilik Qazaqstan Tuńǵysh Prezıdentiniń – Elbasynyń qoryna jáne ol qurǵan ózge de zańdy tulǵalarǵa tıesili múlikke de qoldanylady.
Budan bólek, Konstıtýsıalyq zań Nazarbaev pen onymen birge turatyn otbasy múshelerine tıesili bank shottarynyń qupıalyǵyna jáne oǵan qol suqpaýyna kepildik beredi.