Atalǵan norma BUU konvensıasyna sáıkestendirildi.
Qazaqstanda endi múmkindigi shekteýli adamdarǵa qatysty «múgedek» emes, «múgedektigi bar adam» termıni qoldanylady, dep habarlaıdy Almaty-akshamy.kz
Parlament Májilisi múgedektigi bar adamdardyń ómir súrý sapasyn jaqsartý máseleleri týraly zań jobasyn birinshi oqylymda maquldady.
Zań jobasyna Senat pen Májilistiń bir top depýtaty bastamashylyq jasady.
Zań jobasy boıynsha 75 zańnamalyq aktige, ıaǵnı 11 kodeks jáne 64 zańǵa ózgerister engizý josparlanyp otyr.
«Zań jobasynda múgedek adamdarǵa qatysty dıskrımınasıaǵa jol bermeý maqsatynda birqatar normalar engizilip otyr. Onyń ishinde, «múgedek», «múgedek bala», «Uly Otan soǵysynyń múgedegi» degen sózder tıisinshe «múgedektigi bar adam», «múgedektigi bar bala» jáne «Uly Otan soǵysy kezinde jaralanýy, kontýzıa alýy, zaqymdanýy jáne aýrýy saldarynan múgedektigi bar adam» degen sózdermen aýystyrylady», - dedi depýtat Elnur Beısenbaev.
Mysaly, onyń aıtýynsha, álemdik tájirıbede «reople-first language» degen túsinik bar, ıaǵnı, birinshi kezekte onyń adam balasy ekenine mán berilip, keıin onyń aýrý-syrqaty jóninde aıtylýy qajet.
Sondaı-aq zań jobasymen jumys isteý barysynda depýtattar «soqyr», «sańyraý», «mylqaý» degen termınderdi «kórý qabiletinen tolyq aıyrylǵan adamdarǵa», «estý qabiletinen tolyq aıyrylǵan adamdarǵa», «sóıleý qabiletinen tolyq aıyrylǵan adamdarǵa», «múgedekti ońaltýdyń jeke baǵdarlamasy» degen termındi «múgedektigi bar adamnyń abılıtasıasy jáne ony ońaltýdyń jeke baǵdarlamasyna» ózgertý jónindegi zań jobasynyń tujyrymdamasyna sáıkes keltirýge baǵyttalǵan túzetýler engizdi.
Sonymen qatar, ońaltý, múgedektiktiń aldyn alý jáne osy baǵyttaǵy atqarylyp jatqan qyzmetterdi birizdendirý maqsatynda «abılıtasıa» túsinigi engizildi.
Abılıtasıanyń sapaly uıymdastyrylýy, medısınalyq reabılıtasıadaǵy em-domnyń sapasyn edáýir kóteretin áleýmettik-psıhologıalyq, medısınalyq kómek.